大學比併 7U平飯洗冤錄
「我未做藝員之前，做過燒臘鋪，重燒過燒味添! 」
經常收到好多大學生投訴有關於飯堂食物同埋環境，尤其是平價飯一向予人不美味感覺，為查明是否真有其事，專程搵嚟電視劇《洗冤錄II》中阿蟲 (歐錦棠) 替大家逐款平飯試下，由佢幫平飯一次洗冤。另外，每間U，我都搵嚟30位同學評分，到底平飯係咪真係差嘅呢? 即睇!
☆所選的全是每間U內canteen至平嘅一款飯。
「同學評分」是各U內30位大學生對食物給予的平均分數，所有分數以10分為滿分。「總分」則是歐錦棠加同學所評分數的總和。
港大 激正雞翼飯
梁球琚樓餐廳 $10 (美心飲食集團承辦)
「水準之作，雞翼好有滷水味；而啲飯除咗好香飯味之外，亦好有雞翼味，正! 如果冇擺入嚟嘅話，就咁食白飯都一樣OK! 」
歐錦棠評分：8.5分
建築系 yr.2 Kenneth：「雞翼飯夠平，不過嫌佢太少，而且汁又少，不過味都OK，所以我間中都有食! 」
E&F (Economics & Finance) yr.3 Lee：「價錢平! 好好味! 而且又近自己上堂嘅地方，所以日日都會呢度。」
英文系 yr.3 陳同學：「我好少食10蚊飯，因為都係雞翼、腸蛋，都唔適合我口味! 」
同學評分：7分
總分：15.5分
亞軍
浸大 冇叉味叉燒紅腸飯
林和國際會議中心食堂聯福樓餐廳 $12.8 (私人承辦)
「整呢盒飯個人簡直毫無誠意，求求其其咁整盒飯出，務求食飽人就算。叉燒冇叉燒味，紅腸冇紅腸味，簡直係失敗! 」
歐錦棠評分：6分
Business Associate yr.1 Cherl：「一句講晒，平、靚、正! 可惜整體嚟講，呢間canteen款式唔夠多。」
社會學 yr.1 健仔：「我經常都會食呢款飯，因為唔使等，又唔使諗食乜，味道只係OK，咁平，唔要求得咁多! 」
BBA yr.3 Ming：「我唔鍾意食呢隻飯，因為覺得好乾，好難入口，所以唔食! 」
同學評分：6分
總分：12分
第5
城大 乾到爆鮮茄牛肉飯
美食廣場 $10 (美心飲食集團承辦)
「汁好正! 啲番茄直情一流，夠晒滑溜。雖然有飯香味，不過起『冷鋼』，最可惜，啲牛肉冇番茄味。」
歐錦棠評分：6分
Teresa 職員：「整體嚟講都算OK，但係啲焗飯就乾得滯，而且呢度嘅冷氣太凍啦，可以改善。」
東亞研究 yr.3 陳同學：「茄牛飯就冇乜食過，因為每日嘅10蚊飯都唔同，不過我食其他啲牛肉都覺得好滑，所以應該唔錯! 」
同學評分：6.5分
總分：12.5分
第4
理大 靚仔牛黑椒牛肉飯
新canteen $18.5 (這飯來自美心集團counter)
「飯香就係香，但係冇City咁香，而啲牛就夠入味又夠腍，牛好難整得腍，所以俾高啲分，可惜少汁。」
歐錦棠評分：7分
Building Engineering yr.2 Mendy：「OK，唔係太難食，但係分量就差，唔係太夠。而且大部分飯好多油，唔係太健康。」
社會科學 yr.2 Phoebe：「我都覺得啲牛幾好味，因為唔韌，易入口! 當我諗唔到都會order呢樣! 」
電腦工程 yr.2 Hei：「黑椒牛幾好食，最好係可以叫佢哋俾多啲飯，而我最鍾意係雞翼! 」
同學評分：7分
總分：14分
季軍
中大 怪味餐肉蛋飯
逸夫堂canteen（二樓）$10 (美心飯食集團承辦)
「啲飯唔掂，又生又冇味，而且啲菜重有怪味添，簡直係失敗中嘅失敗! 可以話係咁多間大學中最差。」
歐錦棠評分：4分
GRM (Geography Resource Management) yr.1 阿馬：「啲車仔麵特別正! 好味之外，款式又多，而且呢度嘅員工服務態度又好，地方又乾淨。一句講晒——好! 」
新聞系 yr.3 阿沈：「我叫係因為貪佢夠快，食飽就OK! 」
文學院 yr.1 Anita：「餐肉蛋飯只係一般，我好少食，見到一次同學叫，個樣好似好唔掂，就冇食! 」
同學評分：7分
總分：11分
第6
科大 燒味王叉燒燒鴨飯
LG1canteen $18 (美心飲食集團承辦)
「7U之最! 半肥瘦嘅叉燒再加上脆皮嘅燒鴨，簡直係絕襯，可能係因為自己喺未入行之前係做燒味，呢種味道嘅燒味係難做啲。再加埋咁多菜，真係正! 本來可以俾10分，不過佢都算貴，咁就要扣少少分! 」
歐錦棠評分：9分
BBA (Info Systme Management) yr.3 Katie：「環境好乾淨，種類又多，可惜價錢比較貴，可以再平少少。」
會計 yr.2 Jacqueline：「科大叉燒好好味，有時我嫌肥，又可以叫燒臘叔叔俾瘦啲! 不過啲鴨有時就唔係咁好! 有時冇乜肉! 」
同學評分：7分
總分：16分
冠軍
嶺南 鹹精三星飯(即蛋、腿及餐肉飯)
嶺軒 $20
「賣相唔掂! 食落又過分鹹，又唔夠菜……唉。」
歐錦棠評分：5分
BBA (account) yr.2 Raymond：「差! 啲飯又凍又硬，燒味又唔新鮮(好似隔夜咁! )重有呀，呢度嘅員工慢手慢腳，見到垃圾又唔收，搞到個食堂污糟到死。」
英文系 yr.2 Gary：「三星飯已係代表作，成個Canteen，冇樣好食! 」
同學評分：5分
總分：10分
包尾
歐錦棠總結：
「其實10蚊飯好幾間都唔錯，不過只嫌全部似快餐，無營養，可以的話可以多食三文治、沙律或加多啲菜喺10蚊飯內更好! 」