「師奶殺手」陳錦鴻、歐錦棠橫掃街市

Text: Ming Photo: Sophia

近期,無綫最多師奶談論嘅電視劇《真情》捧紅了一位英俊小生陳錦鴻。

亞視亦出了一位師奶都話佢精靈嘅《睇真D》主持歐錦棠。

今次特別情商兩位到街市買餸嘅原因係想睇下人稱「師奶殺手」,奪去不少師奶芳心嘅兩位靚仔,究竟可以殺到幾多師奶呢?

師奶殺手大測試正式開始

第一回合 講價能力

預算:每人各有50大元買餸錢

目標:一頓足夠兩個人撐枱腳嘅晚餐,餸菜愈多愈好。行完街市一圈後,兩位「師奶殺手」都唔使用晒50蚊就搞掂一餐晚飯,睇下佢哋買啲乜。

歐師奶食譜

一個紅蘿蔔、茅根、竹蔗、馬蹄共 $16

白菜仔一斤(搭蔥兩條) $7

馬鮪一條 $14

牛肉 $7

製成品

第一味:白菜仔炒牛肉

第二味:清蒸馬鮪

阿棠靚湯:清潤蔗水一大煲

陳師奶「菜」譜

生菜一斤 $6

白菜一斤 $6

梅菜一紮 $2

黃魚一條 $6

金銀蛋 $4

莧菜 $4

蜜瓜 $10

製成品

第一菜:辣椒絲腐乳炒生菜

第二菜:梅菜蒸魚

第三菜:金銀蛋莧菜

阿鴻靚菜湯:黃魚滾白菜

結果

陳師奶用咗48蚊就可以做三餸一湯,比起歐師奶用44蚊煮起兩餸一湯,當然犀利啲啦,仲犀利嘅係陳師奶只需10蚊就買到原價11蚊嘅蜜瓜半個兼加送一個木瓜,作飯後甜品用。

第二回合 受師奶歡迎程度

歐錦棠

雖然歐錦棠古靈精怪,但師奶只認得佢西《今日睇真D》主持,望兩眼就走嘞。

陳錦鴻

踏入街市第一步,眾師奶蜂擁而至,目的都係問陳錦鴻《真情》嘅結局,仲話:「晚晚我都睇完至瞓覺o架,你做得好好呀。」嘩! 果然係「師奶殺手」。

結果

陳錦鴻擁有嘅師奶Fans以大比數抛離歐錦棠,可能佢演慣煽情戯,谷到啲師奶個個流晒眼淚,所以早已攞不少分。

結論

歐錦棠:師奶Fans既不夠多兼且買貴餸又食少啲,最多係「中等師奶殺手」。

陳錦鴻:除咗有潛質做煮飯佬外,仲極受師奶歡迎,所以屬於「極度師奶殺手」。

殺手靚湯推介

歐錦棠推薦:Szeman Best(靚湯名稱)

包括有魚唇、群翅、瑤柱、鮑貝。

好處:睇材料都知係正湯一煲,分分鐘補到流鼻血都唔出奇。

陳錦鴻推薦:木瓜煲大魚

好處:潤肺兼養顏,對所有女士非常有益(因木瓜可健胸)。

-- 以上內容來自1995年10月10日 東Touch 第19期 --