狂操70粒鐘撻着Engine 歐錦棠身痕 唔打唔舒服

歐錦棠自小習武,練得一身強健體魄,平時很少生病,就算有傷風感冒,只要睡一晚便痊愈,所以他贊成小朋友從小習武,除了強身健體外,還可以培養出堅強意志。

文:珊珊 攝:甄朝健 場地提供:國際空手道正道塾

歐錦棠是瘋狂李小龍迷,因着偶像的關係,加上天生細胞驅使,他自小已學習中國功夫,師承趙家太祖拳,後來又學了泰拳及跆拳道,現今則沉醉於混合武術,一種講求拳腳踭的武術,另又開始接觸太極。雖然阿棠百足咁多爪,拍戲、登台、演話劇又教人打拳,但每星期仍可抽出五晚來練拳,可見他對武術的熱愛程度。

【最愛:學功夫做運動】

學功夫可以強身健體,阿棠習武多年自然最了解,他說:「學功夫絕對有益健康,所以我冇乜病痛,就算傷風感冒,只要瞓一日就冇事,好多藝員因爲拍劇太累而索性唔做運動,其實愈累愈要做運動,出咗汗反而可以提升精神,正如一部車咁,你淨係抹車唧油唔開Engine,部車遲早撻唔着。(係咪好易受傷?) 其實乜嘢都會受傷,好似跑步傷膝頭,我仲試過因跳舞扭傷盆骨添,反而練功夫冇乜受傷,間中有啲瘀傷都好快消瘀。」

雖然大家都知道學功夫做運動的好處,但往往欠缺恆心,阿棠可有好方法提供? 他說:「唯一方法就係逼自己做,只要做夠七十小時,身體自然會產生一啲激素要你繼續做,如果唔做就會渾身唔自在。」

【最怕:阿媽老火靚湯】

除注意練武強身,阿棠亦好注意飲食健康,他說:「雖然我成日出街食飯,但我鍾意少食多餐,同埋朝早唔使開工時,我都會整啲麥皮、生果來食,清吓腸胃。(你鍾意飲啲乜嘢湯?) 其實我唔鍾意飲湯,以前阿媽煲啲老火湯好肥膩,但每次約人食飯,出門口前都要先飲一大碗,半夜收工又要飲一大碗,搞到自己怕怕。」

【最想:戲劇武術合一】

講到武術,阿棠即滔滔不絕,更公開自己的心願道:「雖然我鍾意武術,但其實我係戲劇、武術並重,希望將兩者集合一齊推廣,好似年前搞舞台劇《大刀王五》,就係用真刀真槍真功夫配合戲劇演出。我仲想將混合武術推展至擂台上,但政府對擂台有好大掣肘,唔知幾時先可以如願,(驚唔驚被傳統武人排擠?) 我掂咗武術廿幾年,其實任何門派都係排斥其他門派,所謂武人相輕,個個都話自己嘅功夫先係正宗,我就覺得冇正宗,正宗亦唔代表最好。」

【習武提升個人意志】

現時不少學校都開設武術班,供學生作課外活動,阿棠認爲學武的確要從小開始,他說:「最好係八至十嵗開始,開頭學啲伸展武術,因爲招式靚,容易培養出興趣,而且冇乜攻擊性,到十一、二嵗就可學搏擊、拳術。(學武會唔會令小朋友變得好勇鬥狠?) 唔會,反而學過武先知大把人好過自己,我覺得學武可以培養堅強的心,尤其係依家香港經濟唔好,更加要提升個人的意志力,單靠娛樂係提升唔到嘅。」

【三日減肥餐單】

雖然阿棠注意飲食健康,不會暴飲暴食,但年前拍《影城大亨》扮李小龍時,他要即時消瘦,就循以下餐單減肥,三日內便減了七磅。他說:「呢個餐單減得嚟都好有營養,中午食兩三隻唔要蛋黃嘅蛋,一客去油嘅吞拿魚三文治,再飲杯水,既飽肚又唔肥,而夜晚雖繼續食蛋,但可以配烚菜、唔用油煎嘅魚柳或雞柳,都可以食少少飯,但記住臨瞓前三小時,一定唔可以食嘢,呢個減肥餐單好健康,最緊要係唔使捱餓。」

後記:決定唔生BB

阿棠老婆萬斯敏較早前去了英國進修,兩口子分開了一段日子,原以為老婆返港後阿棠會好好過二人世界,但他竟預先宣佈說:「老婆讀完就輪到我讀,我會去英國讀戲劇,(點解揀英國?) 純粹感覺,(你兩公婆賺咗錢就去讀書,唔使生仔咩?) 係呀! 我哋決定唔生嘞! 」為求活得開心,阿棠不介意為理想耗費積蓄,明年李小龍逝世三十周年,他更打算再做導演呢!

-- 以上内容來自2002年10月31日 太陽報 --