OurTV 劇場會客室
第六十九、七十集
訪問日期：2010年7月11日
主持：涂小蝶(蝶)
嘉賓：歐錦棠(棠)
- 第一節：接觸舞台劇的經過 -
蝶：歡迎各位收睇《劇場會客室》，今日我哋嘅嘉賓係歐錦棠先生。
棠：大家好! 小蝶你好!
蝶：歡迎你啊!
棠：都要握下手喇，多謝多謝多謝!
蝶：你依家嘞，其實唔係依家，你有好長嘅時間已經係由電視同電影變咗係舞台人嘞o架喇喎。
棠：變咗舞台人喇，嘩，多謝你，即係冠以「舞台人」呢個…嗰陣時覺得係遙不可及，又好似覺得係高不可攀咁，即係嗰陣時有咁嘅感覺。嗰陣時嘅意思嘞，啱啱入行嘅時候。嗱，我入行不經不覺都二十年o架喇，都廿年喇，有喇。咁但剛開始入行嘅時候，香港戲劇界係唔蓬勃喇，有獨立嘅製作好少喇，主要就係話劇團喇，話劇團嘅戲係主流喇，但業餘劇社都有幾多吓嘅。但嗰陣時獨立嘅製作有啲商業運作，有業餘劇社會有啲自己好小型嘅製作，得嗰啲囉。嗰時舞台對我嚟講就係一件遙不可及嘅事，可望而不可即，即係我點樣去lan過呢個門欄咧。已經做咗個演員，係我嘅職業喇，係電視喇，係唔係? 但舞台劇，我唔熟悉，但嗰陣時已經覺得係另一回嘅學問。
蝶：係咪因為唔熟悉，所以覺得有個距離，以為佢遙不可及?
棠：唔係，因為自己有去睇過，嗰時有去睇舞台劇。有次我去睇香港話劇團，我好記得呢部戲：《雄霸天下》。我一睇，嘩，現場嘅感覺就係咁氣勢磅礴o架喇，就係咁好，成班人做一套戲，我唔覺得佢哋做戲，當然都會，你如果跳番出嚟，你會諗番，嗰陣時都諗番，舞台劇係有啲誇張嘅，但係好真喎，咩嘢都係假嘅喇，好真喎，講緊我哋嘅語言喎，好好睇，好吸引我呢個觀眾。我睇完之後就覺得，真係好睇舞台劇! 諗下自己，嗰時係個新人呐，做唔做到，真係唔得喇，我哋做電視都唔係咁做嘅。咁舞台劇有好多嘅技巧，我睇到，咁我係都唔明白嘅，嗰陣時，咁所以我覺得係一件好了不起嘅事。
蝶：嗰陣時係講緊八幾年係嗎?
棠：八/九喇，如果我無記錯，八/九年度喇。八/九-九〇年咁上下。
蝶：King Sir導嘅係嗎?
棠：係呀係呀。
蝶：後尾重好快就重演o忝，呢齣戲。
棠：所以呢套戲對我嚟講個感受好深。由細到大，我好鍾意睇，因為受屋企嘅熏陶喇，好鍾意睇粵劇，即係廣東大戲。咁睇咗係唔少嘅。咁嗰啲有另一種嘅文化，嗰啲我又好鍾意。但係嗰啲始終覺得係有好多固定嘅格式，有好多嘅規定喺度，去到呢度你做一啲嘅做手，某一啲嘅曲牌，曲你照唱出嚟，唱咗個故事出嚟，咁又得嘅嘞喎。咁舞台劇畀我嚟睇，需要另一種嘅技巧。兩者都係舞台嘅演出，粵劇或者舞台劇，對我嚟講都係難度好高，好遙遠嘅事，嗰陣時嚟講。
蝶：係，咁點樣係接觸到啊後尾? 除咗睇之外，點樣慢慢慢慢入咗，變咗舞台人呐?
棠：我入行做電視，因為我係好想做一個演員，我想做一個演員做我嘅終身職業嘅，呢個諗法就係因為我細細個嘅時候睇好多嘅電影喇，睇好多大戲喇，大戲就阿媽帶我睇嘅，電影就爸爸帶我睇嘅，佢哋兩個係唔會crossover嘅啊。
蝶：但嗰啲電影係鬼佬電影?
棠：西片多。我爸好鍾意睇戲嘅。咁我就覺得嘞，當然我細細個已經好明白，嗰啲嘢冚扮爛都係假嘅，但係我睇完嗰啲戲我都好有感動，個感動就係，一係睇完你好開心，一係睇完你會好刺激，因為嗰時好興西部牛仔片，James Bond片，睇完好刺激，或者恐怖片你會好驚，文藝戲你會喊，細路仔都會感動到喊。咁我就好有感動，非常之好，就成日有個諗法，就係如果我第日做到演員嘞，參與到內邊呢，咁觀眾咪有呢啲感覺囉，咁我就好開心喇。即係我作為觀眾，就算我喊睇完套戲，出嚟都係開心嘅。最後一種感覺你都可叫做開心嘅嘢。咁我就覺得做到演員就好好喇。所以收尾都係向呢個目標一路去慢慢邁進，當然我之前做咗好多其他嘅工作先。真係做到演員，我就償咗個好細嘅心願：我可以做到一個演員喇，希望可以做好啲，令觀眾睇到會有佢哋嘅感動，好似我以前細個咁樣嘅。咁但係入咗呢個門檻之後發覺，嘩，天地大到咁樣，單係講「演」呢個字已經係窮你一生嘅精力，咁而且電視以外重有舞台，電影，諸如此類好多好多嘅媒體，所以就覺得係五花八門，但係真係要花好多時間同心血落去，去研究，同埋去鍛煉自己。
蝶：咁跟住係點樣接觸第一個舞台劇?
棠：噢，你咁講呐，睇下先，我要諗諗，我入咗電視五六年度喇，差唔多五六年度，咁都係做…有拍劇喇，收尾嗰幾年就係主持為主，九三年開始去到，好多時都係做主持啊，司儀呀咁樣，開始叫做有人認識歐錦棠呢個人喇。咁但嗰陣時麥秋老師佢就…其實我哋唔識嘅，咁佢就搞套戲《虎度門》，阿杜sir杜國威寫嘅《虎度門》。嗰陣時電影版出過喇，蕭芳芳主演嗰套，king sir都有份做嘅。咁麥秋就搞呢個《虎度門》，謝雪心做女主角嘅，亦都真係有粵劇紅伶龍貫天去做裏面嘅應錦龍，咁佢就搵我飾演裏面一個新嘅粵劇年輕導演，問我有無興趣，我話：有啊! 有興趣! 不過第二句唔敢講出嚟嘅：我唔識舞台劇嘅。我唔識，但我唔敢講，人哋搵我，我驚損失咗呢個機會，嗰陣時會咁諗。
棠：咁就唔使casting嘅，但係就去到開會，跟住就睇劇本，咁咩嘢技巧都唔知，咁你唔知嘅時候，你又覺得，咦，其實裏面有好多前輩喎，舞台嘅前輩又有，舞台嘅新進又有，亦都有啲其他，好似我呢啲電視(人)一齊去做，但無乜經驗，咁我唯有用我自己一路以嚟由細到大最熟嗰種手法喇，observe，即係觀察，唔問咁多嘢，人哋唔講嘅時候你就觀察。當你真嘅想問嘅時候就問，咁一路睇人哋係點囉，睇人哋點排戲啊。嗰次好畀心機，因為好難得可以接觸到舞台劇，我好珍惜嗰個機會，而且太好喇我覺得嗰次個經驗，係有機會演兩個角色，即係A B cast。譬如我係做前半？好似唔知做咗10場定係幾多，好似乎頭個8場我係做導演個角色，都好多喇。最尾兩場居然係做應錦龍啊，即係龍貫天嗰個角色，要上粵劇妝，要唱埋大戲嘅。以一個新人嚟講，舞台嘅新人嚟講，係咪太過分嘞? 機會又係太過寶貴嘞? 咁好珍惜每一個可以同前輩學習嘅機會喇，咁好投入去個角色。
棠：當然，而家睇番，哎，算得乜嘢啊。即係你好努力去做，你都做唔到好好嘅，但係嗰陣時嚟睇就係個天？落嚟畀我，第一次做舞台就已經有咁樣嘅經驗，係好好嘅喇。咁嗰次就做舞台，第一次踏足台板。咁我就覺得，好喇，呢個心願償咗喇，咁鍾唔鍾意呢? 鍾意到不 得 了! 鍾意(嘅)係咩呢? 個個都話，就算未做之前，啲人就成日都話，舞台劇最好就係話同觀眾直接嘅交流，觀眾嘅反應係即時知道嘅，就好開心喇，會再次益到你，咁你喺台上面同演員嘅交流又再去到另一個層次。呢個係有嘅，但係最觸動到我反為唔係呢樣，呢樣嘢我唔係睇得咁重，最觸動到我就係話，舞台劇真係有好多時間畀我排練，好似一舊雕刻品，我要慢慢去琢磨，同大家磨合，如果你相信每一位都係藝術家嘅，係藝術工作者嘅，導演、燈光，或者其他演員呐咁，大家去配合，去磨合呢樣嘢，將嗰個嘢，盡量，喺理想上面，擺到最好嘅，就呈現畀觀眾，嘩，呢件係件幾好嘅事嘞! 咁舞台劇就有咁樣嘅富裕嘅時間嘞，畀我哋可以去咁樣做到喇。
蝶：真係好似個雕刻家咁，慢慢慢慢雕琢佢。
棠：唔止，唔止雕你自己個部分，人哋可能雕埋你，可能幫你：無咗呢個係咪靚啲嘞，又可能會係咁樣，大家去琢磨啊咁樣。咁我就覺得舞台劇，可以畀到好認真嘅嘢呈畀觀眾哋，咁呢個就係最觸動到我，所以我咁鍾意舞台劇。
蝶：下節我哋繼續傾舞台劇。OK，我哋下一節繼續同Stephen傾下計。
- 第二節：踏足舞台初期的工作經驗 -
蝶：歡迎各位收睇《劇場會客室》，今日我哋嘅嘉賓係歐錦棠先生。
棠：繼續。
蝶：Stephen，嗱，你九六年開始第一套戲喇。
棠：《虎度門》。
蝶：咁跟住你一路都有戲做緊喇。咁嗰陣時我當你係前期喇，九十年代嗰啲，我當你前期。嗰陣時你入行嘅時候其實係點樣演嘅，同埋嗰個感覺係點樣，有乜嘢特別嘅難忘事可以發表下?
棠：呢個好巴閉，我呢個劇團嘅「90後」。我個人就好得意嘅，唔停得嘅，我唔畀自己停嘅，因為太鍾意呢個行業喇，即係演出呢個行業喇，無論電影電視好舞台好，我唔畀自己停嘅。好多方面嘅創作呢，就算未試過，因為未試過更加應該去試囉。咁所以就唔會畀自己停。我好記得九六年試咗《虎度門》之後，同一年我做咗兩件我覺得好緊要嘅事——居然自己投資拍自己第一部電影。(笑)
蝶：你自己諗定係有朋友…?
棠：自己諗。諗咗就做囉咁。好多嘢。無乜資源，無資源根本上。無資源你點嘛? 呢個世界上有拍膊頭喇，嗱，你肯開口原來好多嘢係positive嘅。係會得到好多你預想不到嘅幫忙，只要大家睇到你唔係為咗商業喇，或者純粹為咗一啲噱頭去做嘢。你真係想為咗一件事情去做呢，咁好多人會幫你。咁九六年開始，拍電視、電影，成兩年嘅。咁九七年我都記得我都無參與舞台嘅演出喇，或者裏面嘅製作啊咁。
棠：去到九八年啦，九八年嘅時候就，劇場空間，一定要講劇場空間，張可堅，余振球，呢兩老都係我老死，咁嗰陣時唔識佢，就搵我出嚟傾。首先喺電話度問我有無興趣演舞台劇啊? 梗係有喇。九八年嘅時候，應該咁講，講咗之前一件事，九八年我居然嘞就自己膽粗粗，寫劇本，做埋導演，就幫個業餘劇社，幫荃青劇社導一套戲，咁嗰次就，無導演經驗嗰喎我真係。即係中學嗰啲唔好計喇，咁居然寫劇本，導一套戲，咁出咗嚟居然滿座之餘，有劇評，有好評，佢話個概念好好哇，有啲意識都好好哇。咁我就覺得，咦，好有鼓勵性喺度，咁你問我做導演嗰個心得，我講唔上喇。有導演嘅興趣，你畀我揀番，喺舞台劇上面，我都係寧願做番演員。好勞氣，嗰次搞到，套戲可以話係成功嘅，但人際關係，我本身嘅人際關係處理得唔好，同埋嗰陣時搞到幾乎成班無得做朋友咁滯，我處理得唔好，人際關係，我自己嘅問題喇。咁又好勞氣，好辛苦，你唔好搞我。我都係唔想同人排戲喇，你畀我揀，我都係做番演員算喇。
棠：咁跟住導完呢套戲之後，頭先講喇，余振球喇，張可堅，劇場空間就搵我，問我有無興趣再做番舞台劇，我話：再做番? 你有同我合作過咩? 佢話其實，你嗰陣時你唔望人之嘛，即係我成日都，喺陌生環境我就耷低個頭，做嘢就做嘢，唔做嘢就唔多講嘢嗰啲，原來《虎度門》佢哋已經有同我合作，只不過做後台工作嘅嘢。咁所以就無接觸喇。噢，原來係你哋呀咁。咁就入劇場空間做戲，做咩戲呢? 居然叫做《今晚我哋棟篤笑》，同周偉強，第一次合作，就兩個做棟篤笑，就改編賴聲川嘅一個劇本喇。但要將佢全部要轉晒個時代，轉晒我哋所謂localize，所謂本地化，嚟咗香港嘅環境，要切合香港嘅文化，咁換句話講，即係成個劇本掟咗佢，由頭到尾創作，咁又係要參與創作喇，係我同周偉強jam出嚟，同埋有棟篤笑模式，有好多雜耍，我又覺得，幾新鮮，又係一個好嶄新嘅經驗，同之前《虎度門》又兩回事喇，同我自己做導演，又係兩回事喇。
棠：咁跟住陸續有嚟，大家合作得好順利好開心，佢哋就話，你唱唔唱歌o架? 嗱，我就唔鍾意唱歌嘅，不過，我唱歌嘅。即係，我唱到歌，但我唔係琅琅上口，好鍾意成日曲不離口，我唔係，我唔係鍾意唱歌嗰啲人，咁佢就話有套音樂劇。啊? 音樂劇? 邊套? West Side Story，《夢斷城西》。咁細細個已經睇過呢套戲嘅喇，我話：「好犀利喎，套嘢，點做啊?!」佢話：「得嘅，試下喇，我哋有時間畀你排練嘅嘛。」音樂劇，咁就將之前我喺舞台上學到嘅嘢又掟晒去喇。又另外一樣嘢嚟嘅喇喎。我知道音樂劇係要演，係要唱，原來，重要跳。因為呢個West Side Story，跳，係佔咗一個好重要嘅部分。咁我好記得，頭尾排咗五個月。
蝶：其實都好長嗰喇喎。
棠：係。咁我都好樂意去做呢樣嘢。嗰陣時係瘋狂到推咗電視好多工作，我好記得嗰五個月裏面，嗰陣時電影界比較蓬勃啲，蓬勃得嚟因為不景氣，所以好多好平嘅電影可以出爐，好多人拍平嘅電影喇，有9部電影搵我，五個月裏面，你估我做咗咩嘢? 我推晒，推晒九部電影。張可堅都話：喂，你係咪傻嘅? 我就答番佢：我做咗電影，我點嚟排呢套戲呢? 我唔排的話，呢套戲係team works嚟嘅，群舞，成日都係，少咗個人咁點呢? 而我個角色無可能唔跳嘅。咁我係咪跳得叻，我係唔跳得叻嗰啲人嚟嘅，咁我可唔可以唔排唔練呢? 無可能。咁嗰次就感覺到自己好瞓身好投入呢個production裏面，咁我就覺得自己非常之幸運，一入舞台界頭嗰兩三年就參與咗唔同嘅製作，唔同嘅創作，有唔同嘅經驗，接觸咗唔同嘅藝術工作者去教咗我好多嘢，我吸收咗好多好多嘢。我喺舞台界裏面全部都係得著，我失嘅可能係出邊嘅工作，搵錢嘅機會我失咗，但係喺舞台裏面我就得著好多好多喇。對我嚟講係非常之寶貴嘅。
蝶：錢買唔到嘅。
棠：錢買唔到。但你可以話錢買到嘅，因為失去好多搵錢嘅機會o架嘛。但舞台劇，你知，就算你點做，你嘅收入同你擺落去嘅時間都係唔成正比，但我從來都無睇呢樣嘢。
蝶：做完之後其實就越來越鍾意?
棠：係呀! 因為又好難得，又試咗有唔同嘅經驗，新人嚟講，又要做大戲，舞台又要做大戲，又棟篤笑，又搞導演，又編劇，重要做埋歌舞o忝，你試咗晒，基本上係一個基本有嘅條件，喺舞台上面，你叫做接觸過喇，跟住就自己去選擇，自己再投放邊啲資源多啲，你自己去諗喇。咁我覺得有咁難得嘅機會，我係非常之幸運。
蝶：係，同埋無經過要慢慢喺後邊喇，咁樣而慢慢上嚟，擔任重要角色。
棠：我喺電視做咗若干年喇，都已經，咁有啲知名度喇，咁有啲經驗喇，人哋會睇到，亦都會認識我多啲，咁我比人哋行多咗一步o架嘛。
蝶：咁呢個就係九十年代?
棠：九十尾喇。
蝶：你由九六開始，九十尾…咁二千年開始呢?
棠：越來越多喇。九十年代尾嘅時候一年就一部舞台劇喇，因為其實我做電視都非常之忙，同期都有做電台，即係好多唔同嘅參與，去到二千年開始就一年平均有兩部嘅舞台劇嘅喇，一年參與兩部，咁如果以我拍電視咁忙，拍電視劇集又做主持嚟講呢，一年兩部頗多喇。
蝶：係呀，所以排六個禮拜度。
棠：差唔多，個半月至兩個月喇。
蝶：其實你無咗都好幾個月o架喇? 去咗舞台嗰度。
棠：有陣時就得好時間嘅，譬如電視劇，唔係一部接一部嘅嘛，劇同劇之間，我咁啱有個空檔可以接咗呢個，有陣時夾住一起排嘅，咁都無辦法喇，咁都要難為佢哋，因為我工作關係你都要就一就我，幾時排戲幾時排戲之類咁，但又好好彩嘅，即係無影響到成個team嘅製作啊同埋排練嘅時間。
蝶：嘩，好在你時間夾到。
棠：好多時，80%嘅製作，我裏面嘅時間都係配合得非常之好，有時呢啲唔係自己安排。
蝶：可能個舞台好想你喺度。
棠：我唔知啊。
蝶：所以安排得好好。
棠：我唔知啊真係。
蝶：我哋下一節繼續同Stephen傾計。
- 第三節：歐錦棠為何愛「老翻」? -
蝶：歡迎各位收睇《劇場會客室》，今日我哋嘅嘉賓係歐錦棠先生。
棠：好喇，呢次講咩嘢?
蝶：呢次講乜嘢? 由你九六年開始到而家，記唔記得大概做咗幾多套舞台劇? 大概得喇。
棠：廿幾喇，廿幾咋。都係廿幾咋。
蝶：「廿幾咋」都唔係「咋」喇係嗎? 你做十幾年喇係嗎? 十幾年廿幾唔太差喇。你重有其他好多嘢做。
棠：係。我正職係做電視o忝。
蝶：係囉。
棠：咁但係唔係多囉。
蝶：唔少喇。我老土咁問喇，一樣叫做原創劇喇，一樣叫做翻譯劇喇，我知兩樣你都有做嘅，你自己會唔會話有邊樣你特別鍾意，或者係其實各有所好嘅? 你兩樣都會有? 唔同嘅鍾意或者唔鍾意嘅地方。
棠：兩樣都有喇當然。但如果(講)我參與，我諗我大多數我都係做翻譯劇為主嘅，因為我主要以前都係同劇場空間合作嘅機會多好多喇。咁劇場空間佢挂出嚟嘅牌頭就係話佢哋做翻譯劇嘅，翻譯劇係強項嚟嘅，咁每三年度會有一個原創劇嘅，咁但係平時都係做翻譯劇為主，咁我參與就好多係翻譯劇喇，有啲係好著名嘅編劇家，佢哋寫嘅劇本喇，咁有啲甚至乎可能係搬咗上電影嘅喇，所以全部都喺外國累積咗一定嘅程度，一定嘅經驗喺度，觀眾睇出嚟嘅反應係點呢? 或者個題材個豐富性再擴闊好多呢? 咁呢樣嘢，唔好講文化個方面個範疇先，淨係呢兩個題材啊，同埋經歷過觀眾嘅經驗啊，咁我哋將呢樣嘢攞番，攞個劇本番嚟再翻譯成中文喺香港演出，咁又帶畀好多本地嘅觀眾一啲好新鮮嘅感覺。因為有啲題材唔係話我哋諗唔到，而係話你未必會覺得啱香港呢個環境，翻譯劇就係翻譯劇，翻譯劇唔一定為要將個故事本地化。你將佢本地化，有好多人可以咁做，已經係無咗翻譯劇個原意。我唔係話啱定唔啱。咁我哋話畀人聽，呢個係一個外國嘅文化，呢個故事係講外國一啲嘅事情，只不過我哋講緊本地嘅語言。我哋做番個故事出嚟，呈現番，我哋唔需要做外國人。譬如一個英國故事，我哋唔需要做一個英國人，佢點樣講嘢，佢生活嘅細節，有咩動作嘞，係點樣，唔需要。做番個戲，攞番個角色嘅性格去做番呢個故事之嘛。但係呢個就係一個翻譯嘅故事。
棠：咁翻譯劇有一個好獨特嘅文化喺度，包括語言，翻譯上面一啲嘅技巧，我哋甚至乎有陣時聽到會覺得摁耳嘅? 點解? 因為就，唔會本地化喇，咁呢樣嘢又係其中一個好緊要嘅元素嚟嘅噃。所以你話鍾唔鍾意，我無話鍾意定係唔鍾意翻譯劇定係原創劇嘅，咁我做翻譯劇做得多咗，好似而家譬如我揀，好多時我成日都上網睇人哋外國嘅劇本喇，交流觀摩喇咁樣，譬如有啲鍾意嘅，我想做嘅，咪買個劇本番嚟，自己試下翻譯啊，然後改啊，都會有啲咁嘅情況喇。有好多值得我哋借鑑嘅地方，當然我好鼓勵原創。有啲觀眾曾經喺某一啲嘅交流會上面講過，呢套戲幾好，不過若果佢係原創就更加好。即係我覺得會唔會係狹隘咗呢? 即係原創我哋當然要鼓勵嘅，都唔係一定話月亮是外國的圓，但我哋借人哋一啲嘅優點，吸收咗，咁然後發揮我哋自己本地嘅特色囉。咁我覺得呢個係必須。
蝶：翻譯劇，如果既然佢都話呢個劇本幾好，即係話其實佢都感受到嗰個翻譯劇，雖然佢唔係由香港或中國人寫，但係嗰個宇宙性，其實佢係感受到嘅嘛。係嗎? 嗰樣嘢真係無國界之分嘅嘛。
棠：文化就係呢樣嘢。
蝶：我覺得有個好嘅翻譯劇，雖然佢係一個外國人，對我哋嚟講係外國人，但係佢嗰個宇宙性，嗰個普世性，其實佢點可以流傳得耐呢套戲，就係因為嗰樣嘢囉，佢觸動到咩國籍嘅人，咩文化嘅人都觸動到。
棠：無錯，係喇。有好多題材，因為我哋香港局限咗，我哋地域嘅關係喇，好多時，你就算寫咗出嚟，你做咗，睇咗未必會入信，例如如果你講軍事，香港邊有軍事，就算九七前我哋得英軍，而家我哋有解放軍，但係都唔關你香港一般普羅大眾嘅事喇，講咩軍事法庭啫? 唔關你事。好遙遠。但唔係喇，我演劇場空間《義海雄風》(A Few Good Man)，講軍事法庭，係呀，我哋又唔熟悉呢樣嘢，咪就等我哋做一個旁觀嘅第三者去睇呢件事情喇。個故事裏面嘅内容點樣其實唔係一個重點，重點係講出人、人權，同埋軍權，或者正義呢三方面，邊樣係為重，你當要顧及國家安全嘅時候，係咪凌駕於一切呢? 咁呢樣嘢值得，變咗係一件咩事呢? 唔係淨係睇故事，唔係一件曲折嘅法庭案件咁簡單，而係話值得我哋思考。
棠：我覺得無論翻譯劇好，本地創作又好，除咗有娛樂性，或者有一啲嘅可觀性喺裏面，情節嘅曲折，演得係咪好扣人心弦，帶畀觀眾思考，呢一點我覺得係更加重要囉。成日有個好貪心嘅諗法就係，觀眾離開劇場之後，佢哋帶住開心嘅笑容走係好好嘅一件事嚟嘅。畢竟人哋都係畀錢，真金白銀，買張飛其實好貴o架，香港舞台劇真係好貴，不過唔緊要，全世界都係咁貴嘅喇。佢哋得到佢哋嘅滿足係好嘅，但係貪心啲講句嘢，帶住思考返去屋企諗，佢哋諗到乜嘢都好喇，對呢件事情有思考，係一件好事嚟嘅我覺得。如果將呢樣嘢另到佢有一啲嘅想法，同佢身邊嘅人去討論呢件事情，從而對某啲嘢下咗某一啲嘅判斷，或者某一啲嘅觀點作咗出嚟，都係好事嚟嘅。
蝶：咁你會唔會選擇一啲劇本嘞，比較真係思考性啲嘅劇本啊? 如果你既然個時間係咁少喇係嗎，一定要做抉擇嘅嘛，咁譬如同樣有三個劇本喺度，有個可能係思考性啲嘅，一個可能好娛樂性啲嘅，或者一個就係老土啲嘅，咁你會揀邊種? 會唔會真係思考性多啲嘅?
棠：你畀我揀，我都會揀番即係思考性多啲嘅，咁思考性多啲唔代表藝術性一定高，唔係嘅，而係話喺個故事嘅背面，呢個故事蘊含嘅內涵，其實最主要想講啲咩，表達啲咩，有啲咩值得我哋去討論，甚至乎係爭拗嘅，我哋未必要有一個好確實嘅答案去話畀你聽，都唔應該o忝，但就希望帶出呢啲問題出嚟，畀人思考。咁呢個係，我係好深深受到劇場空間佢哋咁多年畀我咁多機會去參與唔同嘅翻譯劇本喇，得到呢個結論喺度，當然裏面佢係有啲「點子」去吸引觀眾，但係佢哋絕大部分嘅製作都係帶一啲思考性喺度，希望畀觀眾去討論呢啲問題。
蝶：你講劇場空間嘅翻譯劇，我記得我睇過你兩次《十二怒漢》，兩次我都睇過。
棠：呢個《十二怒漢》，係喇，無論觀眾當然係(有)一個好震撼喺度，演員，我哋接觸呢個劇本嘅時候，睇埋個場景嘅時候尤其係第一次演出嘅時候，我就覺得，嘩，咪就係話劇場點解會有一個永遠咁吸引人嘅地方呢? 點解做親舞台劇嘅多數都做咗走唔甩，好似上咗毒癮咁? 點解觀眾未必一定係，但係喜歡劇場嘅觀眾，佢哋就永遠都好忠心佢哋嘅劇場，點解呢? 裏面啲嘢冚扮爛都係假嘅，佢嘅空間永遠都係咁細嘅，但係裏面嘅時空係無限制嘅，裏面嘅視野是擴闊到超出晒所有嘅範圍以外，佢嘅空間可以去到無限大，因為我哋嘅想象可以去到無限大，我哋嘅想象同演員裏面嘅想象原來呢方面係可以貫通到，咁我就覺得呢個就係劇場裏面一個好吸引嘅地方，亦都係令到我哋，一眾嘅演員又好，製作人員又好，觀眾又好，咁鍥而不捨去投入喺呢個劇場裏面嘅原因。
蝶：你而家好似話緊畀啲影視嘅演員聽呢個「不可一，不可再」咁樣，有少少。
棠：嘩，你講開影視呢，我自己都踩界喇，咁跟住落嚟就有嘢講嘅喇噃，講下影視有咩唔同，同埋態度應該係點。
蝶：下一節，下一節我哋聽。OK，下一節聽Stephen講呢個態度嘅問題。
- 第四節：影、視、劇演出技巧的分別 -
蝶：歡迎各位收睇《劇場會客室》，今日我哋嘉賓係歐錦棠先生。
棠：繼續係我。
蝶：Stephen，你而家影、視、舞台都有…
棠：有，三樣都有。
蝶：樣樣都有，三樣都有。三樣嘞個演法，以你個人嚟講，你覺得有啲乜嘢唔同嘅要求，同埋你自己點樣去配合三樣嘢? 點樣發揮或者係?
棠：好多人問我呢個問題，甚至乎嗰陣時譬如去啲學校有講座啊，大家討論，佢哋都會發問呢個問題，咁我首先就用番個問題問佢哋先嘅。首先，有邊個鍾意睇電視嘅? 好多人舉手；有邊個鍾意睇電影嘅，少咗啲喎；有邊個睇舞台嘅，再少啲喎。咁我點講畀你聽(笑)，你唔睇，無得講。咁第二，我想講一樣嘢，電視好多人都有睇，都會有啲咁嘅經驗，你問心嗰句，或者你自己諗下，邊個覺得而家睇嘅電視，我哋都係講做戲啊，睇番drama即係電視劇呐，有邊個覺得電視劇係好生活化嘅，係好真嘅? 以個班有二十個人嚟聽呢個講座，贊同嘅可能得兩個至三個，其他嗰啲全部舉手就話：唔覺得。佢哋諗清楚之後覺得：係喎，係唔生活化嘅。跟住大家講啲例子出嚟，攞大家認同啦，佢哋都會諗到例子嘅。我又會提一啲，佢哋又會諗一啲。咁即係換句話講，我唔講好唔好，啱唔啱呢樣嘢先，我唔判斷呢樣嘢嘅，但我就會覺得電視嘅演出並不生活化。
棠：我最初接觸戲劇呢樣嘢嘅時候，佢哋成日啲老師都會同我講，larger than life，drama唔係講？，唔係講play，drama係要larger than life，即係我哋要比生活誇張一啲，放大一啲。咁當然呢個係有一個技術性上面嘅需要，如果我哋喺舞台上邊演出嘅，我哋距離觀眾咁遠，就算第一排望得眼鼻好清楚，山頂嗰個點呢? 我都要照顧佢，咁呢個係可以想象到，係合理。電視需唔需要呢? 電視我哋成日都有close-up，大家個畫面，以前可能十幾廿吋，而家可能去到五廿零吋，哦，就重大啲o忝，所有大頭都重大啲o忝，我哋需唔需要做到咁大嘞? 咁但係而家有個…出咗嚟一個好奇怪現象就係，電視係生活嘅一部分，不可或缺，但好多人唔係坐定定睇電視，而係電視係你屋企內邊嘅一份子嚟。你返到屋企嘅時候，第一件事就係開住電視，跟住就煮餸，去搞嘢，去洗手間，諸如此類，喺書房上緊網，你可能都係開緊個電視，你希望有啲聲去陪緊你，以前係radio嘅時代，而家係電視。咁所以嘞又衍生咗咁樣，我唔知係咪有必然嘅關係，好多時電視係講電視，唔係演電視，演電視劇啊。佢哋講戲，唔係演戲，係講出嚟嘅，將嗰件事，明明我攞頂帽戴咗，然後我飲杯水，佢而家：啊，有杯水喺度，啊，我戴番頂帽，飲杯水先。佢做咗，又要講番一次嘅，好多類似咁樣嘅情形嘅。
蝶：我明。講電話嗰個最明顯喇係嗎?
棠：係喇。
蝶：將對方啲嘢復述一次。
棠：無錯喇。喺電視嗰度觀眾已經睇咗呢件事點樣發生嘅，下一節番嚟譬如我做咗一件咁嘅嘢，跟住我喺下一節番嚟我見到你，我將頭先我做過嘅嘢講多次畀你聽，好？？，又重復，重復又重復。咁所以呢個係唔生活化嘅。例如好多嘢，佢哋講嘢嘅語氣，你聽咗可能覺得無乜嘢，但係，我成日都話，你跳出來，眯埋對眼，淨係聽對白啊，你就覺得：咦，我哋日常生活唔係咁樣講嘢嗰噃。佢哋真係講緊台詞o架。
蝶：我知，尤其是好多時，佢要provide information畀觀眾，所以嗰兩個人係咁講埋嗰啲嘢，嗰兩個人唔需要講嗰啲嘢，佢哋唔會再講o架喇，因為佢哋已經知道曬嘅喇，但係就好硬生生咁樣就係講畀觀眾聽。
棠：加上如果我知道內邊嘅製作過程係咁匆忙，好多時真係o架，演員未必咁好充足嘅時間去準備呀好多時，都唔係一定無，但好多時唔夠囉，或者經驗有限喇，佢就變咗要剝生吞嗰啲台詞就咁講出嚟，你聽到就算喇，加上而家重有字幕幫一幫你o忝，其實觀眾吸收咗有幾多呢? 唔知。咁呢個係電視，所以如果你問我，電視我覺得係誇張，我覺得係誇張嘅。我唔覺得咁樣係啱定係唔啱，而家我評品佢係誇張。
棠：電影我哋就好唔同喇，因為電影銀幕，就算我哋所謂戲院細間就好多喇，我哋細個戲院好大咁，戲院細咗咁多，但個銀幕始終有番一定嘅size喺度。我哋喺銀幕上面表現到嘅，大頭就真係，嘩，10米高嘅一個人頭嚟嗰喎可能係。咁我哋需要嘅演技喺個技巧上面，我哋需唔需要咁大嘞，其實真係唔需要。當然有啲導演，譬如處理一啲鬧劇嘅時候，可能用一啲好誇張嘅手法都唔定。但一般嚟講，一般嘅情節啊故事片啊咁講，喺戲院內邊一個空間內邊，已經係黑漆漆嘅空間，所有觀眾嘅凝聚力就喺個銀幕上面，注意每一點，邊個郁緊就睇緊嗰樣，所有嘅人都係，佢入得戲院，佢唔會諗住，大部分嘅觀眾喇，佢唔會諗住入去睇下又行下又出去洗手間又聽電話，未必係咁，佢哋想留意銀幕上面發生嘅嘢，所以我哋唔需要做到好大。電影嘅要求就真係要好自然，甚至乎有陣時係比自然更加要重要收緊啲。係o架，會o架。有陣時，譬如，電影重要多幾個手法，就係話，導演，如果高明嘅導演，佢哋會用鏡頭去說故事，佢哋未必靠台詞，唔係講出嚟，所以有陣時，反應，我哋成日講reaction，我哋嘅反應，我哋演電視嘅反應，譬如一聽到一件晴天霹靂嘅事，個導演就要求你，個鏡頭：「啊?!——真係?!——」好誇張。電影完全你唔會睇到啲嘢，就算你做個反應係好細嘅，某啲導演可能不使要，我連呢點我都唔要，可能係細到咁，你會奇怪：啊? 真係細到唔使做? 唔係唔使做，而係話唔要你咁做。你可能要試幾個畀佢take，有啲導演譬如就算外國？？？，佢都話：「我使乜演員諗嘢啫? 演員唔使諗嘢，你唔需要諗做咩反應，你企喺度望住啊。」「咁，咁我哋講緊咩啊?」「你唔好理啊，你望住啊。」佢take咗你個鏡頭，佢剪番落去，因為佢喺腦裏面有曬所有鏡頭，佢知曬故事嘅流程係點，佢可能好熟喇，佢本身都係編劇喇吓。咁你呢個鏡頭剪咗落去，就代表你已經有個思考喺內邊，觀眾可能會覺得已經好有嘢都唔定啊，但係佢無顧及演員內邊嘅諗法囉，我未必講得咁樣係啱嘅，當然呢個導演嘅手法可能係處理得好好呢? 佢可能可以做到咁樣。咁但係的確譬如喺銀幕上面，電影上面我哋就唔需要去到咁大咁誇張嘅，反應啊表情啊咁，甚至乎好細嘅某啲情況，如果導演好熟悉嘅，佢都睇到，太多喇，可能一個呼吸、一個好細嘅眼神，眨眨眼，已經係代表某一種嘅反應。
棠：老實講，我哋日常生活上面，邊有咁多表情啊? 尤其係香港人o忝。外國人、日本人，可能佢哋嘅生活上面嘅文化，佢哋嘅反應會大啲，係嗎? 即係「Oh! My God! What're you doing?」好誇張咁樣講法呢啲。但係，香港人始終係比較含蓄啲，咁所以譬如我哋處理番本地電影嘅時候，好多時都會有啲導演要求要再將佢再收細啲，呢個係咪最接近自然嘞? 可能係嘅。但係，我哋可能有慣性，演戲，去演呢樣嘢畀觀眾睇到，但係電影上面就唔會需要囉。將我哋再控制得，範圍再縮窄啲，個注意力啊咁。咁但係講番舞台喇，咁有啲人而家唔識舞台嘅，佢就話：「誒，舞台劇好誇張嘅。」啱，但係都係唔啱。我頭先講咗喇，舞台劇之所以要誇張，就因為我要顧及到，照顧所有嘅觀眾，第一行、最後個行，尤其是譬如你話有啲大劇院，有三層樓咁高，最尾嗰行嘅觀眾我都希望佢睇到，佢睇唔到我表情喇，咁我都要有我嘅肢體動作啊，係嗎? 我都要表達到畀佢，我嘅聲綫我要抛到畀佢，用「咪」可以幫到，但我哋都可以用我哋真嘅聲綫去投放畀佢，睇唔到我嘅表情，好細微嘅變化，所以我要大啲囉，我可能，一句好簡單嘅答覆人哋嘅台詞，我可能用埋我嘅身體，我要郁動，佢哋先睇到我做咗呢個咁樣嘅動作啊反應啊咁樣。所以就係呢個舞台之所以誇張的合理嘅原因就係咁。
蝶：好。我諗你舞台重有好多啲經驗同我哋分享，下一節繼續。
- 第五節：當演員的條件 -
蝶：歡迎各位收睇《劇場會客室》，今日我哋嘉賓係歐錦棠先生。Stephen，你係影、視、劇三栖動物喇。
棠：呵呵，三栖。
蝶：咁o依家其實影、視兩栖動物多唔多變埋三栖啊?
棠：近呢幾年咪多咗好多囉。你都睇到喇。
蝶：但係佢哋由兩栖變三栖，但係有無好似你咁樣一路都三栖緊? 多唔多，呢一種又?
棠：我無特別留意，但我僅見嘅就好似無喎，用極少嚟形容囉。因為點解呢? 好多影視界嘅朋友，都有參與舞台嘅演出喇咁，佢哋試咗之後，都會鍾意嘅，但係就都係覺得花太多時間落去，唔成正比。你知香港好多，電影好、電視好，都係好即食文化，快! 時間就是金錢。咁舞台劇你投放咁多時間，咁多心機落去，但得番嚟嘅，即你演出得個幾場啫，十場八場好多o架喇，咁得番嚟嘅酬勞唔成正比喎呢樣嘢。係嗎? 譬如有好多「明星」，佢哋出去剪個綵，講幾句嘢，咁已經好多錢嘅喇。咁你做舞台劇，做極畀你爆曬，你會搵到幾多大家心知肚明喇呢啲嘢。咁佢又覺得：係好嘅，呢啲經驗係好嘅，咁但係呢樣嘢都係阻咗我時間去第二啲地方搵食。所以再肯番轉頭嘅人唔多囉，咁但係佢哋耐零中又會心有？就話想再做番下舞台喎，因為可能享受在舞台上面嗰種感覺嘅。
蝶：佢哋可能好似你初初嘅時候嘞，覺得：嘩，好似好神聖啊，遙不可及咁。佢哋又好想呢樣嘢，即係挑戰又好喇，或者係提升自己又好。
棠：舞台劇就永遠都有個魅力喺度嘅喇，就係覺得，點解啲人會覺得遙不可及，覺得係咁了不起，就係因為全部過程係現場發生畀你睇嘅，同埋你睇到內邊係好多技巧你要照顧到嘅，對一個演員嚟講，你做到呢樣嘢，咦，都對自己一個考驗嚟嗰喎，如果你通過呢個考驗都係認定咗你自己有呢啲咁嘅技能嘅噃，咁所以佢哋就會着迷呢樣嘢喇，當然唔好，更加唔好講嘅就係觀眾對你嘅認同喇，讚賞啊，你即時會知道有幾多喇，呢啲屬於虛榮嘅喇(笑)，咁但係，呢個就永遠係舞台劇令人着迷嘅地方。
蝶：咁你覺得影視嘅演員嘞，入嚟舞台喇，對舞台，你覺得係好定唔好啊?
棠：以我自己嘅經驗嚟講，即係我做舞台十年有多喇，十幾年啦，個經驗就話，初初畀人一種新鮮感，但當我越來越參與多嘅時候呢，就會，嗰陣時越來越，啲人覺得好奇怪：繼續做咁多舞台，喺電視已經不斷見你嘅喇喎。佢哋覺得：喂，我哋唔同界別嚟嘅，你唔好入嚟喇。我係真係遇到呢啲阻力嘅。
蝶：舞台嗰啲(人)啊?
棠：係呀。「我哋唔同界別嚟嘅。」有人同我講，話：「嘩，」講笑嘅，但係佢真係會用呢個字眼，「嘩，舞台嚟搶飯食好喎」咁，要搵飯食我就唔揀舞台喇。但係點解大家會有啲咁嘅諗法嘅呢? 你講好咩好，你嘅心唔係咁諗你唔會講呢句說話出嚟。我好記得呢句說話。有一啲嘅阻力，但到我自己一路以嚟投放多嘅時間落去，多啲，大家有目共睹：呢個人唔係玩玩下嘅，佢都係真係好愛呢個舞台劇嘅演出嘅，或者內邊嘅製作啊，呢份藝術嘅。咁佢哋先至開始認同我囉，我都覺得係…其實我唔需要得到別人啲認同我先至可以喺呢個地方生存，但係得到佢認同，係唔容易嘅。呢個我睇到。近呢幾年其實我覺得，影視界嘅人入去舞台，或者調番轉，而家都有舞台嘅人做番影視，不嬲都有o架喇，唔係一件稀奇嘅事嚟，呢樣嘢係必須嘅。
棠：你睇番外國嘅，好多影視界，就算荷李活首屈一指嘅明星，Al Pacino，係咪，Nicole Kidman，佢哋都會去演舞台劇o架，佢哋定期可能演一次半次嘅舞台劇，舊年Jude Law啱啱做完Hamlet喇，喺London嗰度，呢個係佢哋覺得係必須嘅，同埋佢哋好多出身根本就係學院派，佢哋就有好濃厚嘅戲劇嘅訓練，佢哋做番呢樣嘢，佢哋覺得係理所當然，唔係為咗乜嘢，只係為咗藝術呢樣嘢去演出。外國個文化就允許我哋咁樣喇，但我哋香港點解會有啲咁樣嘅睇法呢? 因為，香港大部分嘅演員，現存嘅演員——我唔係講演藝學院嘅吓，演藝學院嗰班係例外——係無受過專業嘅訓練，訓練班裏面嗰啲，對唔住，嗰啲唔係訓練，電視台搞嗰啲訓練班唔係訓練，會剝生吞，同埋太過急促，你根本接觸唔到，你完全消化、吸收唔到，佢哋係靠出嚟自己摸落去喺裏面嘅經驗，然後，若果有嘅話，用自己嘅人生嘅經驗，融會落去，咁樣喺電視裏面摸出嚟，大部分係咁。咁所以，舞台對佢哋嚟講係好新鮮同埋充滿刺激，同埋係比較難度高一啲。
蝶：你頭先講嗰個電視台嗰訓練，你意思係咪即係話譬如去揀咗一班藝訓班嘅學員，其實佢係揀嚟做明星，係咪咁啊? 即係而唔係嗰個演技嗰度去投放好多時間……
棠：佢根本就唔，即係電視你知，賣廣告點解會咁貴，卅秒點解會咁貴，就因為每一秒都係時間，佢點可以投放嘅資源，嘩，要你演藝學院讀五年?! 唔好傻喇，三個月你好出嚟同我做嘢喇，實習期又另外三個月喇。寧願係要咁樣，因為反正我點樣出嚟，你不斷做，你就會有經驗，就會有人睇你嘅喇。嗰班未必叫明星，但都需要一班演員，就需要一啲咁樣嘅嘛。咁所以，你好多時，而家我講真嘅，喺電視圈內邊做咗好多年嘅藝員，你同佢哋講演技，佢真係唔知你講緊乜，佢哋以為某啲，我咁樣演就已經係喇。佢哋唔會明白囉。當然呢個佢哋只不過係唔知道，接觸唔到啫，咁其實我又覺得唔應該分為有界別嘅。演員係無界限嘅，我覺得，即係以我個經驗，我咁樣睇嚟，當然最理想就係話我哋由教育開始。所以我睇到開心，即係香港嘅教育，而家由小學好，中學更加o忝，有戲劇教育喺度，我睇到係一件好開心嘅事嚟嘅，因為我哋細個嘅時候我哋無機會，搞劇社自己搞之嘛，邊有老師理你啫。咁但係唔係o架，你而家有好多嘅資源，畀到你哋可以有時間去學戲劇，喺戲劇內邊去學習文化，學習語言都有喎，同埋好多嘅學生專場去睇唔同嘅舞台劇喎，呢個文化咪植根喺年青一代裏面，大個嘅時候佢哋咪就係話，譬如有演藝學院繼續嘅培育啊，或者遲啲重有兩間藝術學院去培育，人才咪越來越多，呢個文化咪慢慢咁樣形成囉，咁呢個以前我哋係零，我哋無嘅。我睇到，呢件係好事嚟嘅。
棠：我講番呢樣嘢就係話，我覺得演員唔應該分為有界限，邊個界別你都可以做，只要，只要你有咁樣嘅熱誠，有咁樣嘅才能就得喇，呢個才能有人會係天生一部分，但我就喺個劇院內邊，無論邊個界別都好，你一刻都不能停止去吸收，同埋練習。呢個係我嘅睇法。演員，無論舞台，點都好，譬如舞台劇就算我哋排，誇張到排West Side Story，排五個月好多喇係咪? 有幾多套有咁充裕嘅時間畀佢去排練呢? 無嘅。可能兩個月嘅排練已經係叫做唔錯。咁，作為一個演員，係咪要get ready呢? 我哋成日都要準備好我哋自己，我哋準備好自己咩呢? 我哋準備好自己嘅身體，同埋我哋內邊嘅內涵，呢啲嘢喺邊度睇，我哋就要喺第二啲嘢度吸收，不停要去睇人哋嘅演出，不停去睇，觀摩人哋嘅電影，不停去睇其他嘅文學作品，書，睇書，演員唔可以離開睇書，我成日覺得，咁同埋，我哋好好哋運用我哋嘅家生，我哋用咩表演? 我哋用我哋把聲、身體去表演，咁呢啲嘢平時就要鍛煉，唔係話：「啊，嚟啊。」咁就嚟，無呢回事。即係所以邊個界別都…我覺得只要你孭住呢兩個字，職業係「演員」嘅，你就要好好哋對待自己嘅身體，所有你內邊用得嘅嘢，包括你內邊嘅思考啊，你吸收到嘅文化嘅知識啊咁，呢啲就係靠我哋平時儲番嚟嘅，係一刻都不能夠停止。
蝶：我諗你應該開始，你個「儲」嘅意思係真係認真咁樣諗點樣去儲咗佢，你第日呢可以寫番本書。
棠：嘩，呢樣嘢對我嚟講係遙不可及嘅。
蝶：係嗎? 但你嗰陣時都覺得舞台劇遙不可及，你都做到喇。我相信總有一日你會做到嘅。
棠：你幫我寫啊?(笑)我無資格。
蝶：有心就得o架喇。OK，下一節我哋繼續同Stephen傾計。
- 第六節：歐錦棠與香港劇壇的發展 -
蝶：歡迎各位收睇《劇場會客室》，今日我哋嘉賓係歐錦棠先生。Stephen，你入咗舞台都十幾年喇。
棠：十幾年喇，係呀。
蝶：好喇，咁一定係有好多嘢都睇到，或者好想同我哋講下，咁，你睇到啲乜嘢?
棠：睇到好多戲囉，百花齊放，越來越好嘅。我睇到最近，七八年囉，近呢十年，舞台劇係越來越蓬勃嘅，以前個資源去咗邊呢? 無人睇喎，原來有戲無人睇，或者有人無戲睇，咁但係而家係多咗好多喇，你諗下電影就真係慘，一年嘞都唔夠四十部電影，港產片我講緊，但舞台劇，若果你要睇的話，寫包單，你睇唔曬，係每一個星期有幾套嘅演出，包括埋業餘嘅演出喇當然係，咁又有幾咁蓬勃嘞? 咁舞台劇嘅觀眾係咪多咗嘞? 若果你真係要數據的話呢，我而家手頭上無個數，但我睇過嘅，咁同十幾年前相比係多咗，但多咗嗰個百分比係咪多咗好多? 未必。未必，因為有啲洗會流走，即係講恆常哋去劇場睇嘅觀眾呢，佢嘅增長量都唔係話有大幅嘅增長。但係多咗人去認識同埋接觸舞台劇。咁都係因為一個氣候嘅？？，譬如有好多商業嘅運作喇，比較適合一般大眾，通俗啲嘅口味喇，佢哋覺得舞台劇未必係一件咁嚴肅，令人害怕嘅事情喇，原來舞台劇都可以有娛樂性喎。咁佢哋就好樂意花啲錢去劇場度睇戲。咁同埋另一方面，演藝學院當然係培訓咗咁多嘅人才出嚟，嗰啲學生，就算佢哋自己都會有自己嘅製作嘅，大亦好小亦好業餘亦好，都會有自己嘅製作。咁亦都質量、水準都比一般係好啲嘅，點都係。咁所以都會有一定嘅保證喺度，質量。所以觀眾係會多咗。咁我睇到就好似百花齊放喇，加上我頭先講，我話而家學生就好幸福，有戲劇嘅教育畀佢哋，有好多嘅培育，咁同埋有好多戲可以畀佢睇，學生專場吖咁樣。佢哋只要肯，願意，咁就好多嘢可以接觸到喇。咁但係係咪一件好事呢? 誒，係嘅。
棠：但近一兩年開始我又睇又一個新嘅階段，我唔知我有無睇錯，我覺得係一個汰弱留強嘅時代開始，因為太多。太多，咁你個餅仔，原本舞台嘅、戲劇嘅餅就係咁，你？大啲個餅係咁樣嘅啫，你唔會突然間變咗個？？大餅嘅，唔會嘅。少少，同埋呢個餅靚啲嘅啫，個餅只會越來越靚，但食嘅人，去分呢個餅好多人，越來越多，係唔夠食，就好似早嗰幾年係嗎，百花齊放，咩人都做戲，個個都鍾意去搞戲，因為可能表現自己喇我唔知，但係就變作係好良莠不齊喇，好參差，咁觀眾係會選擇嘅，有幾多個係會畀同情票你呢? 真金白銀買飛啊大佬，睇場荷李活嘅電影都係五六廿蚊飛係嗎? 禮拜二唔使o忝。劇場點都百幾喇，點都要喇，有啲唔止，佢哋咪會選擇囉。咁多選擇嘅時候，你水準唔夠嘅，你無呢個誠意嘅，創作係令人失望嘅，就好簡單，觀眾係會放棄啊。咁佢就留唔到喺度喇，除非你水準繼續攀上去，與時並進，如果唔係，你就留唔低呢個圈子內邊，咁我而家開始我睇到，係有個汰弱留強開始緊，咁所以大家係要繼續努力囉，同埋都係要摸索一個路向喺度喇。
棠：香港好熱衷音樂劇，但音樂劇係咪屬於我哋呢個(環境)? 唔係嘅。音樂劇，呢個係外來的東西，我哋唔可以硬搬一套落嚟，因為我講緊嘅係廣東話，廣東話就最攞命喇九個音，每一粒音符加一粒字落去永遠就得出一個結論就係觀眾就聽唔到你唱乜，重要啱平仄，重要有個意思喺度，同埋我哋中國人講意義，好簡單個詞語，好似戲曲咁，好簡單個詞語就講咗好豐富嘅事情出嚟，咁我哋喺音樂劇用唔用到呢? 又要(面臨)選擇呢個問題，咁係咪成套硬生生搬過嚟就係我哋，變咗我哋嘅音樂劇嘞? 咁我又覺得未必係嘞。咁呢樣嘢要必經，我哋有呢個過程嘅。但係都係靠大家嘅努力，繼續去摸索，同埋去創作多啲新嘅點子出嚟。
蝶：同志仍需努力。
棠：一定要! 革命尚未成功。
蝶：係呀。但雖然嗰個路係咁樣吓，你又知道係咩汰弱留強咁樣係嗎? 但你都好似又有啲新嘢做出來喎。
棠：咁我都話喇，我自己唔停止o架喇，當然喺舞台上面我都係一路要繼續努力喇，好似今年咁，嗱，一〇年我有七個演出(笑)，好傻呵? 好癲呵?
蝶：七個…你之前話廿幾個係咪包呢七個?
棠：廿幾個未包嘅。
蝶：未包…哦，咁你就要一次過……
棠：今年有七個。咁但係因為同唔同嘅劇團合作過，咁但係都係累積咗某一啲嘅經驗，有啲自己嘅想法，有啲戲我係想自己去搞去演出，咁就惟有靠自己喇。咁所以就自己成立咗一個劇團喇。上個月成立咗喇，第一個演出將會喺嚟緊嘅二〇一一年一月，咁就會演出嘅喇。
蝶：不如你話畀觀眾聽你嗰個劇團嘅名，咩戲?
棠：噢，我劇團嘅名大家聽到都要諗：「劇-道場」，戲劇嘅道場。道場其實係日本文嚟嘅：Dojo。咁因為我有練空手道喇，都係日本嘅文化影響我比較多，喺個道場內邊嘞，係有個範圍，大家都知喇，入到去除鞋，道場內邊呢個範圍係神聖。出入我哋就要畀禮，無人喺內邊我哋都要畀禮呢個道場。我哋唔係話有咩神明喺內邊，而係話要我哋要好尊敬呢個地方，劇場係一個值得我哋去尊敬嘅一個神聖嘅地方，咁而且有個道場內邊係咩嘢嘞? 道場內邊唔係畀你玩嘅，唔係畀你去演出，係畀你去修煉自己，係畀你去提升自己，我覺得呢樣嘢係貫通嘅，喺武術上面同埋喺戲劇上面，藝術上面，都係劇場裏面永遠一個修煉我哋嘅地方，去體驗人生嘅地方。如果你喺戲劇體驗人生嘅，喺劇場上面，都係我哋磨練人生，同埋反映人生畀觀眾睇，而呢種互動係永不止息，唔係淨係單向畀觀眾，觀眾都要畀番我哋嘅。呢個社會有嘢畀番我用，我要返番畀呢個社會睇番。所以我就改咗呢個名，因為我成日都抱住一個宗旨：你無論做咗幾多年戲都好喇，你都一定有可以值得改良嘅地方。咁即係話我哋演員有個，如果有個終身嘅使命就係話：我哋不能夠停止去練習，去吸收，頭先我講咗。所以都係抱住呢個宗旨囉。
棠：我第一炮演出就係我同我太太萬斯敏兩個，重有其他演員喇，咁我哋就演出一個，都係翻譯劇——《再見別離時》，比較文學啲，文藝啲。咁呢個又係講人際關係，尤其是夫婦嘅關係。尤其是而家呢個社會，人嘅關係已經係疏離咗好多，夫婦關係既然可以同衾共枕，但係都可以話反轉豬肚，反面不理人，好多離異嘅事情。點解人會將感情同埋關係睇得咁冷漠嘅呢，係咪真係無得修補嘅呢? 咁藉住呢件事，呢個故事，我哋講番人同人之間，尤其是夫婦關係。
蝶：咁你係演? 導係咪自己?
棠：其實唔係。咁演我就，呢個翻譯劇喇，我太太負責翻譯喇，咁但內邊有若干嘢我都改編咗，我有啲嘢要改編，即係呢個我係，嗱，同我頭先講嘅又唔同喇，呢個我就將有啲嘢要本地化嘅。導演呐，傾咗好開心喇，陳曙曦幫我哋做導演呐。陳曙曦嘞對感情呢一方面處理呢，我睇過佢好多戲，啊呢個人，你見佢真係成日都，唔係好鍾搞笑，無咩嘢講咁，佢對感情嘅處理嘞，好細緻，咁所以我揀佢啊，我覺得一定係啱嘅喇，希望大家會留意啊，出年一月。
蝶：但係劇團會係，係咪都以翻譯劇為主多啲啊? 抑或咩都有?
棠：有個大計嘅喇，頭嗰幾部製作嘞，都係翻譯劇，都係外國嘅一啲嘅文學嘅創作，未必一定係劇本，係文學嘅創作，我哋將佢改作劇本啊，因為文學有文學性喇，同埋頭先講咗一樣，係一個世界性喺度，外國嘅文學，但係講緊嘢唔係一定係佢本地嘅嘢，內邊佢嘅內涵，佢講緊嗰個實體個主旨，大家、全世界所有嘅人都會認同，都會感受得到嘅。所以我希望呢樣嘢都係跨過國界，去表達呢樣嘢。
蝶：好，一月係嗎?
棠：係。一定要嚟喎。
蝶：我一定會嚟。好，今日多謝曬，多謝!
棠：Thank you! Thank you!
蝶：多謝各位收睇，拜拜。
- 完 -