蘇玉華專 歐錦棠強 同一類人 唔要下一代

有留意電視的人,相信都應該聽過或講過以下對白:「嘩! 嗰個邊個喺亞視嗰套咩戲嗰度扮李小龍好鬼似喎! 」

仲有一個…「有冇睇過嗰個,以前做舞台劇幾靚嗰個係港姐嚟o架! 」

一段日子後…

「歐錦棠喺《烈火雄心2》個師父仔角色幾正呀…」

「蘇玉華喺《婚前昏後》度搶晒阿姐鏡呀…」

以為每一個人都有一個姓名,但娛樂圈就唔係每個人都有名有姓喎……

蘇:蘇玉華   棠:歐錦棠

互不認識

蘇:我唔覺得自己出名咗就代表個個都識我喎,我到而家每次識新朋友都一定會自我介紹,免得人哋真係唔識我,好尷尬o架嘛!

棠:嘩,乜你咁睇小自己? 雖然我識新朋友時,都會自我介紹,但只係禮貌問題…

蘇:你識新朋友嗰時,麻煩你笑吓,你個樣唔笑好惡呀。

棠:唓,個個唔笑個樣都惡o架! 個人唔惡咪得囉… 你第一次見我嗰時,你覺得我個樣惡唔惡吖?

蘇:我第一次見你? … 係喺電視機見到你咋喎… 我都唔識你…

棠:唔係呀,真係有講嘢嗰隻呀… 唔記得呀?

蘇:唔記得呀… 喺邊度呀?

棠:喺百老匯電影中心呀…

蘇:啊… 係呀… 嗰次你喺嗰度搞咗個有關李小龍嘅會,咁啱我又去嗰度睇戲,所以撞到你。

棠:我第一次見你,我就知你個人好真!

蘇:咁犀利? 睇吓就知?

棠:唔係,係因為你失驚無神走嚟對我講咗一啲嘢,就憑嗰番說話,我就知你個人好真!

蘇:吓? 我講過啲咩呀? 我嗰陣時好似仲唔識你o架喎…

棠:最震撼令我嘅係,你對我嗰份信任呀!

蘇:吓? 我講過啲咩呀?

棠:我哋之前係從來未見過對方,淨係知道對方係邊個,嗰次第一次傾偈,我已經不期然咁有咗一份好莫名嘅友情,好似識咗好耐咁!

蘇:吓? 我講過啲咩呀?

棠:你真係唔記得呀?

下刪約十次重複問題及答案…

棠:講講吓發覺其實我哋識咗唔係好耐…

蘇:係喇,但係就有一種老朋友嘅感覺!

棠:我哋冇乜機會成日見到面,亦都冇約埋一齊出街食飯傾偈。

蘇:好奇怪,但係每次偶然見到對方,我哋都好清楚大家諗緊乜,係咪唔開心呀咁…

棠:係呀,連大家嘅情緒起伏都唔使講出嚟,而係感覺到嘅。

犘斯密碼

棠:我記得早陣子喺工作上面經歷咗一啲好唔開心嘅事,我同佢喺電視台碰到,佢用咗一種好巧妙嘅言語向我噓寒問暖,旁人無法聽得明我哋之間嘅意思! 呢啲係非一般嘅朋友可以做到。

蘇:真係好嘅朋友唔使話成日見住,大家有嗰份心嘅,段友誼一樣會咁堅固,而事實上,呢行嘅工作時間亦唔容許可以成日同朋友見面。

棠:唔好話朋友,我老婆去咗北京讀書,我同我老婆都兩年冇見…段關係一樣可以維持得咁好。

蘇:尤其是身邊嘅另一半,就更加唔應該因為見得少,而影響兩者之間嘅關係。係唔好嘅,就算日日見住都唔會有好結果。

棠:我只要知道我老婆喺邊度,做緊啲乜,就已經好足夠。

蘇:人生唔係淨係談情說愛,仲有好多好有趣嘅嘢可以做。

冇仔送終

棠:我就係呢啲人喇,乜都想做,我太太又係一個無事忙嘅人,我哋兩個都停唔落嚟嘅! 所以我哋都一致決定唔會要細路,我哋自己都唔夠時間用,點可能會有足夠嘅時間去教育下一代? 我冇仔送終o架!

蘇:哈哈…我都係,我始終覺得香港唔係一個良好嘅環境俾小朋友成長。如果我嘅子女將來生活得唔開心,我見到會好心痛,既然有呢個可能性出現,我選擇唔要下一代。

棠:係呀,生個細路出嚟,要付出好大,唔同我哋以前個年代,細細個就要出嚟捱,要學識自立!

蘇:喂,聽講你自細已經係太子仔o架,有家族生意o架喎!

棠:生意仔咋,冇錯我係比好多同年紀嘅小朋友幸福,但係我一放學要去幫屋企人手,一樣都係捱出嚟o架!

蘇:嗰個年代,幾乎十居其九嘅細路都可以話天生天養,細細個就要自己照顧自己,我就覺得自己嘅童年欠缺咗好多小朋友應該要有嘅嘢…

棠:係呀,一個細路仔應該要接觸不同嘅知識,咁先至可以有一個更好嘅成長過程,一個更優質嘅生活。

想做去做

蘇:講開優質生活,做咗咁多年人,係最近先開始學識好好咁享受人生,去做一啲自己開心嘅事,甚至乎有啲工作唔想接嘅,都情願唔做,唔強迫自己。

棠:咁你以前做嘅嘢係咪自己鍾意做?

蘇:都係o架,由我做舞台劇開始,直至做電視或者其他嘅媒體,都係因為我想做先會去做…

棠:我就唔係,我而家所做嘅嘢都係為咗幫助我嘅舞台事業,你都應該好清楚,喺經濟上唔容許我淨係做舞台劇。

蘇:我就因為揀Job做,我上年成年都冇接嘢做,雖然喺經濟上變得冇咁穩定,但係我好開心,做咗好多之前冇時間做嘅嘢! 直至今年先拍番劇。

棠:咁咪好囉! 我上年又停咗其他嘢,專注做舞台劇,一口氣全年做咗五個舞台劇! 今年又係先開始拍番劇,同做一啲其他嘢。

給阿蘇…

某程度上,我哋都係同一類人,大家都努力喺生命到搵一個平衡點。但有一樣嘢,你比我利害,你對生命嗰種熱愛程度,我冇辦法做到。喺你身上,我找到一個字,「專」。

給阿棠…

我喺電視上睇過你嘅戲之後,我已經感覺到你係一個咩性格嘅人,到我識咗你之後,發覺你嗰種並不隨波逐流,無論喺幾惡劣嘅情況下都能夠盡量表現到最好,我好開心,因為我冇睇錯。我都喺你身上找到一個字,「強」。

後話

訪問完畢之前,阿棠話:「有啲嘢,唔係你就唔係你嘅,整定o架!」

阿棠指的,是工作上。

熟識蘇玉華的,都知道她叫Louisa,簡稱阿Sa。但自從出現了一個年齡與資歷都差

一截的Twins阿Sa之後,阿Sa就索性叫阿蘇。

訪問完畢之後,再回想,阿棠話:「有啲嘢,唔係你就唔係你嘅,整定o架! 」

阿棠指的,原來是任何事件上。

-- 以上内容來自 2004年8月8日 新報 --