創世日誌

主持:萬斯敏  嘉賓:歐錦棠

Phyllis-萬斯敏  Tong-歐錦棠

- Part I 2008年7月4日 -

Phyllis:Hello,大家好! 今集嘅《創世日誌》請嚟咗一位對我嚟講好特別嘅嘉賓,佢就係我先生我老公喇歐錦棠嘅。

Tong:大家好!

Phyllis:阿棠,你係覺得…其實我係好奇怪呵?

Tong:我覺得非常之不自然o忝。我訪問(別人)就好多喇,我好似訪問過你,但係你訪問我諗都冇諗過有呢一日。

Phyllis:係,咁應該都要對面吓嘅。因為我諗嘞,你平時喺啲商業嘅電視台內面嘞,好少分享你自己嘅信仰,但今集嘞…

Tong:兩個第一次囉:今日我係好開心囉! 第一次畀你訪問啦;第一次分享信仰啦。

Phyllis:係呀我覺得都好特別吖吓。嗱,不如咁喇,好多人都問我:「喂,究竟你先生信咗未o架? 係咪基督徒嚟o架?」你自己親自同觀眾講吓究竟你係咪基督徒。

Tong:其實好怪,係又點? 唔係又點嘞? 咁其實最近有一次有個…我又唔記得啦…你知我成日都唔記得嘢,淨係記得有啲咁嘅情形:「吓! 你基督徒?!」咁我就好奇怪:點解你哋個樣咁奇怪呢? 邊個:「你唔似囉!」「基督徒有樣睇嘅咩?」我話。畀我幽咗一默,佢話:「咁嘛係…」

Phyllis:係呀,基督徒有基督頭吖、基督衫……

Tong:基督衣著係嗎?

Phyllis:基督衣著。

Tong:其實我係嘅。但就由細到大,我諗如果我信主,即係喺個心裏面信主,我早你好多。因為我幼稚園就已經喺基督教學校喇,咁小學、中學我都係天主教學校喇,即係讀聖經嗰陣時我最高分。

Phyllis:嘩,咁犀利? 咁即係話,由細到大你都已經係信得好好o架喇喎?

Tong:誒,唔可以話好好。因為其實我諗你識我咁耐,你同我拗咗咁多次,你知我比較剛硬啲喺內邊。

Phyllis:我梗係知道喇,我要你親口同觀眾講之嘛。

Tong:同埋太理性得滯。我就覺得我感性,但周圍嘅人又會覺得我理性,呢樣嘢我好矛盾嘅。咁好多嘢就唔係話拗嘅,但我要去信服喇,咁即係譬如喺《聖經》上邊講,如果咁樣以我呢類咁嘅人嚟講,我就係無福嘅,不夠你哋咁有福,即係你要見好多嘢,我唔係話我要見到神蹟,但係我要尋求好多嘅原因去解釋,因為我自己解釋唔到,同做戲一樣,我說服唔到自己,我說服唔到人。

Phyllis:其實我覺得你好有福嘅,因為你自細就已經認識到神喎,細細個小學已經係讀《聖經》喇,讀中學又係天主教咁樣,變咗你不斷都讀好多《聖經》知道咗好多神嘅道理吖。

Tong:我好有福嘅,我太太帶咗我入教,最後。

Phyllis:係呀,終於都……其實唔係我帶,我諗神一路喺你身上邊做咗好多嘅功夫。但係你而家已經係堅信嘞喎?

Tong:我係o架喇。我唔會走,因為其實我搵到有一個道路,我諗我堅信,但係我個信仰,你知而家我做好多嘢喺度摸索緊,同埋我仲喺度自己…唔係鬥爭,而係話我要去尋求答案,我甚至乎同人哋去辯論,都會吓。咁我諗,我喺一條好啱嘅道路上面,我搵緊係真理嘅方向,真理係乜嘢。

Phyllis:太好喇! 其實你信咗主嘞,最開心嗰個係我啊!

Phyllis:阿棠啊,雖然嘞你細細個就已經讀啲基督教嘅小學喇,但係我知道你屋企就唔係信主嗰喎,係唔係嘞?

Tong:umm,仲好抗拒o忝。

Phyllis:係呀。

Tong:因為我屋企不嬲都係喺街市做啲小生意吖,咁你知喇尤其商業社會即係華人商業社會,好多都係求佢哋嘅,所謂求神拜佛吖咁樣,即係其實又好似無壞咁樣嘅,佢哋只不過求家宅平安喇,細路仔快高長大吖,出入平安吖,最好就求財,??都係求財o忝喇…

Phyllis:係。

Tong:咁由細到大都係接觸好多好多,拜乜都唔知,真係乜都拜嘅。我出世據講我腳頭唔好,都幾黑嘅我個人…咁就一出世就唔夠五日就要過繼,唔係過繼,係上契喇,畀某一種嗰啲偶像……

Phyllis:咁先至可以令到你快高長大。

Tong:或者令屋企人好喇,我唔知啊。我唔敢問,問乜都唔得嘅,嗰陣時係。咁細細個就做埋啲咁嘅嘢喇,即係乜都唔識都去拜喇。到我懂事,八嵗九嵗嗰陣時已經開始好唔鍾意呢樣嘢,跟住就唔肯做。

Phyllis:但點解你會唔鍾意嘞吓?你學校嗰邊影響緊你就係信耶穌喇,但係屋企影響緊你就係拜偶像喎。

Tong:嗱,呢樣嘢好得意嘅,即係我唔係話呢叫緣分,而係話嘞,即係屋企人為我著想,為我前途好,學校嗰個教育好喇,知名度高喇,係嗎? 所謂名校,所以叫我讀天主教學校,千方百計要搵人介紹要我讀天主教學校。

Phyllis:都好奇怪喎。

Tong:係喇。哦,咁你哋又唔信喎,入咗去又唔畀我信喎,係嗎? 咁但我喺度受教育o架嘛,有神父咁樣,朝朝都祈禱,同埋見到個總堂在嗰度o忝,接觸嗰啲地方,我接觸好多。但我屋企呀,譬如家庭吖、鋪頭吖咁,所謂拜啲神……

Phyllis:你又要去拜嘅?

Tong:日日都掂o架喇! 就算一日三餐我哋食飯佢哋要裝香咁要你做呢啲嘢喇。

Phyllis:但點解你對呢方面你覺得有啲厭倦咁樣呢? 即係你唔信,「我覺得呢啲偶像嚟嘅啫,唔係一啲咩神。」點解你會咁諗呢?

Tong:Umm,我諗畀我,即係天生我比較理性一啲。即係我覺得點解你求就會畀你咋? 細細個就已經識諗呢樣嘢喇。同埋,吓? 咁得意? 個個求都畀你? 係嗎? 同埋例如某一種嘅偶像,黑道又拜佢,阿做警察嘅又拜佢…所以呢樣我覺得咁得意,哦,食燒肉,哈,燒乜攞去都得嘅? 梗唔得喇。咁即係生前死後冇乜分別喇,我哋唔同世界係一樣嘅,呢樣係令到我好細個嘅時候好唔信服。同埋即係唔係西方,即係基督教,唔係西方,不過即係我哋受西方文化影響,個教義吖,同埋嗰個故事性非常之好,細細個就算我唔懂事都好,我都睇到譬如耶穌出生《聖誕?》好浪漫嘅一個故事嚟,我覺得係唔係呀。咁跟住你接觸聖經,你覺得:咦,呢個教義喺度,起碼呢個神佢為咗愛世人,佢做出啲嘢。咁拜其他偶像你為咗咩嘢? 畀咗啲乜嘢? 我唔知。

Phyllis:其實你個理性令到你遲咗去相信我哋基督教喇,但係亦都因為幫咗你、救咗你一命。

Phyllis:阿棠吖,你細細個已經受到你家庭嗰個宗教嘅熏陶喇,咁喺呢一個咁樣嘅宗教信仰底下呢你覺得你自己開唔開心?

Tong:首先嗰種我唔覺得係宗教,佢哋都無尋求啲乜嘢。宗教係有一種嘅終生意義喺度嘅,咁佢哋尋求啲乜嘢? 冇嘅。好片面好表面嘅嘢,咁但帶畀我一個字就係「煩」,好煩好多嘢,即係同埋牽涉好多金錢上嘅嘢,呢個宗教牽涉金錢。

Phyllis:點解牽涉金錢?

Tong:即係你買好多祭品嗰啲嘢。我唔係講捐獻,我從來都唔見有捐獻嘅,揼落所謂香油箱,我又唔知做乜。同埋好多嘅我覺得係不需要嘅儀式喺度喇,我覺得好煩好煩。

Phyllis:點解你會覺得對你自己個成長會有影響嘞?

Tong:呢樣嘢就因為細細個嘅時候,可能天生第一就理性喇,第二接觸咗天主教學校,成日都會睇到《聖經》喇,一個禮拜雖然只上一堂《聖經》但我都好用心學嘅。起碼我比較,除咗屋企拜神,以前我阿嫲帶我去新界,新界喎,某啲好大嘅佛堂嗰度,咁佢哋會「你聽,聽嗰啲梵音吖,聽嗰啲……」嘩,頭都暈埋,聽見都驚。咁同埋「你跟住唸」。唸咩嘢啫? 我都唔識唸緊乜,我完全唔識唸緊乜點解唸嘞? 你又唔解釋畀我聽。

Phyllis:都有好多時又都係喎! 好似我阿媽信嗰啲日本佛教,佢又係唸唸唸唸,但我話:「點解o架?」佢又唔知點解喎。

Tong:嗱,好難。雖然我睇聖經,我唔識英文咩? 你咪搵個牧師嚟教曉咗我,用中文解釋番畀我聽,跟住我就會識o架嘛。跟住起碼我明白:「哦,個教義係咁嘅。發生過件咁樣嘅事,歷史上面記載過件咁樣嘅事。咁我會覺得顯淺易明,起碼我會信服,有好多嘢,容易入門。第二啲你唔好搞咁多,又唔知唸乜嘢,你都唔知你唸得啱唔啱。咁呢樣嘢起碼喺我裏邊有個好大嘅衝擊。

Phyllis:即係話你嗰啲偶像嘞從來都唔覺得對你有幫助嘅?

Tong:即係耳濡目染之下,你話少少信喇,細個你知喇?

Phyllis:即係曾經信過嘅?

Tong:星座你又睇,係嗎? 乜運程你又實要睇吓。有啲人好得意,睇相嗰啲我就從嚟冇睇,咁我啲同學個個樂此不疲喇,個個都玩呢啲咁嘅嘢。咁愈大就愈覺得呢啲好傻嘅,已經係開始唔信喇。

Phyllis:阿棠,頭先一路聽起上嚟呢,你對基督教嘞好有好感咁,由細到大都係喇。但係當我真係回轉嘅時候,你又好似好抗拒喇,同埋你同我講過,你話你有時想追一個女仔,點知一知道咗佢係一個基督徒嘞,你即刻就轉軚喇,我唔再追佢喇。點解會有咁樣嘅反應嘅你?

Tong:你都知我個人,我就好鍾意自由嘅。我就無嘢規範到我咁滯喇,即係我就我鍾意咁就咁啫,唔好叫我過啲群體嘅生活,我會孤獨嘅嘛。

Phyllis:係。

Tong:我鍾意自己一個人。

Phyllis:非常清楚。

Tong:咁譬如嗰陣佢又返教會,又同成班朋友一齊,唔好喇啩? 所以嗰陣時好怕。跟住你真係回轉喇,你入咗教,咁我未準備嘅嘛,你準備咗咋。咁同埋嗰時我哋都有好多唔好嘅關係……

Phyllis:係呀有好多好多問題喇。

Tong:拗撬喇。

Tong:你突然間一下子,一個禮拜好狂熱返幾次教會,好多嘢好狂熱,我又唔理解你嗰教咩嘢,譬如你話:les a,哦,我知有咁回事。你唔講我又唔問,我聽,嘩! 咩嘢嚟o架? 咩嘢教會,會唔會導致人哋,即係人哋同屋企分離啊? 諸如此類。返到屋企又係,返到屋企帶廿幾人返到屋企,我最怕見到人,佢帶廿幾個我唔識嘅人返屋企,你話有咩嘢辦法做人老公嘅唔驚? 你真係有啲責任。

Phyllis:唔係其實嘞……

Tong:乜都唔記得嗰陣時。

Phyllis:但係嘞,可能有啲時你都已經係好抗拒。或者係,我諗我突然間對依樣嘢,咦,嗰樣嘢令到我好開心嘞,令到你好無安全感。

Tong:我唔理解。因為其實所有嘅害怕歸咎於你理唔理解,你無安全感,你先至會驚。但都係大家欠缺溝通,嗰陣時有問題,大家都不肯,都比較剛硬啲,不肯坐低慢慢傾,或者想坐嘅時候都唔肯放低大家嘅身段。

Phyllis:我記得嗰陣時,大家傾,傾咗好多好多次嘅喇。但係就自己有自己嘅觀點喎,我覺得真係神喺我哋中間,就可以令到兩個好唔同嘅人都可以撈埋一齊嘅。

Tong:係呀。

Phyllis:其實嘞,我好開心你今日肯喺咁多觀眾面前講我哋曾經有過問題喇,一般肯講出嚟話,即係話而家問題嘞已經係淡咗好多喇。

Tong:第一,事無不可對人言;第二,我更開心就係,我公司肯畀我,即係能上其他啲電視台,呢樣嘢我覺得都好似史無前例,證明佢哋都覺得即係宗教電視台呢樣就非商業嘅運作。

Phyllis:係值得推廣啊。咁我就覺得,我自己認為嘞,神喺我哋中間就修補咗我哋嘅關係。你自己點睇?

Tong:呢個完全好深深體會到,即係期間我哋唔好講,撇除我哋嗰幾年好痛苦咁,大家好多拗撬啊,好多問題……

Phyllis:好多問題喇。

Tong:跟住你又去咗兩年英國,呢樣嘢又好好彩,即係間接其實我哋兩個分開咗喇已經。

Phyllis:係。

Tong:雖然我嚟探你幾次啊,e-mail啊,電話咁來往。即係如果嗰陣時,我哋唔去珍惜番或者係諗番我哋嘅關係應該點樣去改進,我哋各有各的改進嘞,咁就拜拜。

Phyllis:係。

Tong:咁就第日先見喇。

Phyllis:爆多樣嘢畀大家聽喇,其實…

Tong:爆?!

Phyllis:哈哈,係唔係好驚嘞? 又無安全感喇係嗎? 其實我去完英國之後嘞,我臨番嚟之前你記唔記得你同我講話:「你番咗嚟之後嘞,啊,你搵定咗,即係因為我好習慣自己一個人。」

Tong:係呀。

Phyllis:係呀,「咁你番咗嚟之後,?????,我哋睇吓點樣再搵屋搬喇」咁樣。你曾經講過呢句說話。

Tong:我梗係記得喇。嗰時我自己…嘩,你畀咗兩年自由我,我自己一個人我慣晒喇。

Phyllis:即係好自由喇,唔駛畀人再約束番。當時我就喺度諗,我話我同神講:我祈咗個禱啊。

Tong:係咩?

Phyllis:你知唔知…係呀,我祈咗個禱。當然我不斷都有祈禱喇,但係嗰次我就問神喇:「咦,我返到去點嘞? 係咪真係好似你所講,會搵屋搬呢咁樣?」但係嘞神好清楚話畀我聽:「如果你問我嘅話嘞,我真係唔願意一對夫婦分開嘅。」咁所以變咗嘞,我就好清晰喇,我以前就諗我應該向前行定向後退嘞咁? 但係嗰次嘅祈禱之後話畀我聽:你無得向後退,你只可以向前行,淨係點樣係行得好。我覺得神真係喺我哋中間做咗好多嘢嘞,亦都修補咗我哋嘅關係喇。我知道大家唔夠喉嘅,我哋呢個節目只係廿零分鐘喇…

Tong:仲想爆咩吖你?

Phyllis:係喇。咁你夠喇咩? 我覺得第一次,我哋嘅第一次咁樣喺呢度傾計嘞,應該唔夠喉嘅。

Tong:斬多四兩吖。

Phyllis:係嘞,繼續下個禮拜再上嚟,好唔好啊?

Tong:好啊!

Phyllis:好,多謝你! 好喇,今日時間差唔多喇,送首歌畀大家。下個禮拜再見,拜拜。

- Part I 結束 -

- Part II 2008年7月11日 -

Phyllis:Hello,大家好! 今集嘅《創世日記》嘞除咗我萬斯敏之外,繼續有我先生歐錦棠喺度同大家傾吓計嘅。今集嘞阿棠啊,我想同你傾多啲關於娛樂圈嘅嘢。

Tong:即係工作嘅嘢係嗎?

Phyllis:係喇工作上嘅嘢。

Tong:我都鍾意講工作嘅嘢。

Phyllis:吓? 你唔厭咩?

Tong:厭我一早唔做喇係嗎? 如果厭我已經唔喺呢行喇。

Phyllis:你係咪由細到大你都知道你自己好鍾意做戲,我要入呢行,係咪你已經有個好大個志向?

Tong:好耐,我好細個已經會諗,點解會咁諗,當然應該要多謝爸爸,多謝媽媽。

Phyllis:點解?

Tong:媽媽喺我細細個,幾歲就已經掹我去戲棚睇大戲。

Phyllis:點解你唔去做粵劇嘞?(而)你去做電視嘞?

Tong:我都想。嗱,你聽我個名都似粵劇嘅喇!

Phyllis:錦棠係嗎?

Tong:咁第二樣嘢,爸爸就(喺我)細細個,冇乜娛樂,佢淨係鍾意睇戲、玩吓啤牌咁…

Phyllis:爸爸都係睇粵劇?

Tong:唔係,爸爸一定唔睇粵劇,就一定睇西片。

Phyllis:哦…

Tong:就掹我去戲院睇西片,個個禮拜都睇。嗰時好幸福o架,睇好多戲o架,所以演員夢就係睇好多唔同嘅電影啊,粵劇啊,吸收啲文化咁,睇嚟睇去……我就好乖,真係好淨心睇喎,真係吸收好多呢啲,咁我就覺得睇戲令到我好開心,(對)觀眾好好嘅。

Phyllis:即係當時已經一路睇嘅時候一路就話:「哎吔,如果我做演員就好喇!」

Tong:就覺得電影啊或者舞台上邊千變萬化,雖然係假嘅,我都知係假嘅,但係就覺得呢個世界真係好多姿多彩,同埋好奇妙囉。咁同埋令到觀眾會好開心,就算你傷心嗰種都係一種開心嚟嘅。

Phyllis:呢兩樣嘢比較起上嚟呢? 粵劇同西方嘅電影咁樣,你鍾意邊樣嘢多啲?

Tong:無得咁比較嘅,例如而家你話我成日都做舞台劇嘅喇,亦都拍緊電視喇,鍾意邊一樣多啲? 咁我兩樣都會鍾意嘅,咁就只不過形式又唔同喇,體驗都好唔同,帶畀大家觀眾嗰個感受,甚至乎做緊嗰個使命感都好唔同。

Phyllis:佢朝頭早都可以一路播住「篤篤撐」嗰啲…我都好鍾意粵劇,但朝頭早就好驚啲鑼鼓聲o架喇。

Phyllis:頭先大家啱啱聽完嘅嘞就係《彩虹下的約定》。阿棠啊,頭先你講開就話,你好鍾意睇戲喇,睇電影喇,但電影對你嚟講,係咪一路淨係一個觀眾,對你嘅心靈有冇咩嘢嘅影響?

Tong:hmmm咁睇嘅,即係我諗我領受力比較強。咁我睇譬如中國舞台,咁即係大戲嘞,王侯將相才子佳人又永遠大團圓結局,忠奸分明就梗嘅喇,其實都幾好,即係一個因果嘅報咁樣,有咁種嘅意思喺度。但係睇電影嘞,反而西方電影嘞,各類型嘅戲我都會睇啊,佢有一種好勵志嘅,即係都會有類似嘅情況,但係會有種好勵志嘅主旨喺背後話畀我哋聽。有啲電影就話譬如我好鍾意睇嘅《星球大戰》(Star Wars),佢係話,你朋友有難,你唔係要去幫佢,你等佢自己去奮鬥,如果唔係你幫咗佢嘅話,你抹煞咗佢奮鬥嗰種嘅權利喺度。同埋我睇過有套…即係我諗係Disney嘅…我好細個睇嘅,我唔記得咗咩嘢戲,咁佢講「神只會幫助嗰啲能夠自己幫助自己嘅人」,咁我就覺得係喎!

Phyllis:好啱。

Tong:咁人真係有陣時要藉靠神,但係,我哋自己要做嘢先得嘅,唔係淨係企喺度:「你畀我喇!」就會有啊? 唔會嘅,如果唔係我哋就無咗奮鬥呢樣嘢。所以一個「奮鬥心」呢三個字就植根喺我內邊喇。即係講番小小即係細個嘅時候屋企曾經有個好差好差嘅經濟環境喇。咁即係爸爸嗰陣時又唔喺度喇,畀政府追啲苛稅,我真係認為係苛稅,都唔知,鬼知點解要立呢啲稅。咁佢哋就,我覺得好愚佢哋,即係譬如攞啲六合彩喺度,攞啲香喺度咁立,即係佢哋真係流晒眼淚喊晒咁喺度,立咗出嚟呢啲number中咗,你就可以過咗呢個咁嘅厄運喇,解決呢個咁嘅難關。我就好記得我企開咗,我真係,所有屋企人都喺度但我企開咗,我第一次同神講:「無嘅! 有都無嘅!」即係如果唔係就……

Phyllis:你係同你自己信嘅…?

Tong:係喇,唯一一個,我第一次咁樣同佢講:「無嘅。」即係如果唔係,就抹煞咗我哋自己嘅奮鬥,我係咪學壞師嘞,我係咪睇錯電影? 唔係,一定唔係。我覺得你抹煞咗我哋…有幾艱難啫? 可以有幾艱難啫? 嗱而家好啊無中到啊,我咪喺度,屋企好好,係嗎? 即係太容易得嚟我哋唔會珍惜嘅。所以就好感謝,即係(我)細個爸爸成日都帶我睇電影我學咗呢樣嘢。

Phyllis:咁會唔會係你自己個思想個教育都係嚟自電影?

Tong:好多! 電影嗱,你唔好話有個使命感喺度,所以我哋做演員即係除非有陣時譬如電視或者某啲決定,你無辦法唔做啲嘢嘅時候,可以喺能力範圍之內,即係要覺得自己有個使命感,呢樣嘢好緊要嘅。

Phyllis:所以點解我要加入創世電視嘞,因為我覺得真係電視媒體呢樣嘢真係可以影響人嘅心,係直接打入人嘅思想入邊嘅。

Tong:好緊要o忝。

Phyllis:係呀。

Phyllis:阿棠你睇電影嘅時候你就睇住嗰個熒光幕嘅時候,你就好想去好欣賞嗰個電影喇,好羡慕佢哋喇,咁但係你又入咗行喎,係咪呢條路好容易行嘞? 點解你會入到行?

Tong:易行啊? 都唔係o架。我點解入咗行? 我同你一齊考呢個藝訓班喇。咁其實我入行之前我做咗好多其他嘅動作,動作喎…即係好多嘅職業。咁屋企嗰陣時幫手嗰啲唔算喇,我做過part-time記者喇,雜誌記者喇,我做航空公司做咗若干年喇都…

Phyllis:所以點解你去咗成四廿次日本喇。

Tong:之後嘅嗰啲係。嗰陣時都去得多,嗰陣時唔駛??機票。累積咗某啲嘅社會經驗,咁然後跟住就話畀自己聽:其實我好想做演員呐,但你都知道我其實,你認識我咁耐,你知我又好內向o架嘛,我…

Phyllis:你唔係咁積極係嗎?

Tong:無表演欲嘅。鍾意演戲,但係無表演欲。好矛盾我個人。

Phyllis:係喇。

Tong:嗰陣時又唔敢唱歌,我都唔敢喺人前唱喇,你唔好話講嘢、演戲……

Phyllis:睇佢唔出真係。

Tong:係咪先? 唱卡拉OK我唔唱o架。

Phyllis:你知唔知個個朋友都問我嘞:「你老公係咪真係好多嘢講啊? 喺屋企係咪好開籠雀咁嘅? 係咪好似呢個武紀勇一樣o架?」

Tong:真係煩,假嘅,全部都係假嘅。咁嗰陣時就覺得好想入呢行,但你咁樣封閉自己你無呢個機會,年紀愈嚟愈大你就喪失呢個機會,你個願望就唔會成真。咁就會破釜沉舟就辭咗份工去投考咁。咁結果經過幾次喇,我考咗五次,即係有五次咁多,咁就入咗個訓練學院,正式開始我演員嘅生涯喇。

Phyllis:嗯,最大嘅得著就係取咗我喇。OK,轉頭番嚟再同你傾過。

Phyllis:嗱,我哋雖然經過五關嘞、斬六將先至可以入到呢個娛樂圈喇,但係入到呢個娛樂圈,我自己嚟講就唔係幾開心喇,因為點解我唔開心嘞? 我諗唔喺呢集度講喇。咁但係你嘞? 就好似入到行之後一帆風順喎?

Tong:你覺得係咩?

Phyllis:係囉,所以我覺得觀點與角度都唔同嘅。不如你講吓,你喺入咗行之後你係咪一路都開心?

Tong:一路都開心? 不如咁講,我人唔係好開心,即係我諗我個人由細到大我都唔開心。但係你話我好悲觀,嗱,我睇嘢就好灰色嘅,但我睇嘢就並不悲觀我成日好矛盾…

Phyllis:係呀,真係好矛盾喎,聽起上嚟就好似好灰嘅。

Tong:你覺唔覺得有陣時我揸揸吓車「好靚啊,個天…」我會好開心讚嘆咁嘛,我睇到呢樣我就好開心喇,睇到自然嘅環境我就好開心,睇到「嘩! 月光…」我就傻嘅,為嗰啲嘢我會好開心。

Phyllis:呢啲係童真喇。

Tong:係喇,我傻嘅。咁我為嗰啲嘢好開心,但基本上我人會覺得好唔開心。點呢? 因為細個到大我都覺得,呢個世界好唔公平。呢個係FACT,係事實嚟,但我偏偏為呢唔可以改變嘅事實,我就好唔開心。入咗我哋呢個所謂娛樂圈,太多呢啲嘢……

Phyllis:係。

Tong:係嗎? 好多唔公平嘅嘢。你一分耕耘唔係一定有收穫o忝,無啊可以。但一路你就會覺得咁你耕唔耕耘? 都要。

Phyllis:都要做。

Tong:你做唔做啊? 係喇。做咗唔代表有喎,但你做唔做啊? 但日子有功,而家我真係覺得好好喇。以前你點猛點醒,當然盡咗好多力,做200 percent嘅嘢,你可能攞番百零percent咁都好好喇…

Phyllis:80個percent已經好好喇…

Tong:好好喇,已經好好喇咁,咁但係辛苦囉。而家就好開心喇,而家你唔駛咁辛苦。

Phyllis:睇吓點解佢有咁樣嘅轉變嘞? 轉頭番嚟再同大家傾吓。

Phyllis:阿棠其實你喺娛樂圈都好多年喇,咁開唔開心?

Tong:我都,之前我講咗喇,我本身我係一個唔開心嘅人,喺娛樂圈譬如見到好多,見證到好多唔公平嘅嘢喇…

Phyllis:但你際遇都好好喎…

Tong:你睇我好,咁其實不為言,自己努力過,同埋都有好多隻幸運之手幫吓我,咁樣喇…

Phyllis:你本身有個唔開心嘅嗜好,你會唔會?

Tong:所以我咪多牢騷囉。我見到好多唔公平嘅嘢嘅時候,就算有啲嘢唔關我事,我都會牢騷埋。嗰陣時你都見嘅喇,喺舊公司。即係譬如唔關我事,但我見到好唔啱嘅嘢,我會發好大嘅脾氣,即係動怒咁。所以但又好開心依樣嘢,我入行無幾耐嘅時候好唔開心,譬如做咗節目啊,若干年之後慢慢有一個位置嘅時候,一地震,轉高層,轉人事變動就塌番落去最底做,又要由頭嚟過喇。咁呢樣嘢唔緊要嘅,因為嗰陣時仲係後生,同埋??? 但係畀人踩嘛! 仲要畀人用好刻薄嘅說話嚟對你,嗰時就好唔開心。你記唔記得有次同你第一次去Disney嘅時候好唔開心,但我見到啲人日日喺度跳舞,嗰啲Parade又靚,佢哋個個都好開心。嘩! 佢哋日日做同一樣嘢都可以咁真心咁開心。

Phyllis:仲一日做好多場o忝噃!

Tong:佢哋得,點解我哋唔得? 點解我哋做布景,我唔可以開心? 跟住好奇跡,喺個灰姑娘嗰個花車上邊,灰姑娘就話:「你夢想就係你心入邊所渴求嘅嘢」,咁啲眼淚就嚟喇。即係我覺得呢樣嘢(係)神講畀我聽。演戲係你夢想嘛,做演員係你夢想o架嘛? 諗咁多做咩嘢啫? 要你做一棵樹,你就做好靚一棵樹。咁返去之後就好用心去繼續,唔追求任何成績喇,咁繼續一步一步慢慢去做好自己。

Phyllis:其實我哋嘅職業就係我哋自己理想嘅嘢嘞,我哋好想做嘅嘢就係我哋鍾意演戲o架嘛,真嘅可以畀我哋做到,其實我哋已經好幸福喇。咁雖然我知道你睇完嗰個花車巡遊之後,你好感動囉,但係都幫唔到你啲咩嘢。但係時間又差唔多喇……

Tong:咁點嗎?

Phyllis:阿棠啊,你可唔可以一得閒嘅時候再上過嚟嘞? 我真係覺得好似有啲唔夠喉,我諗觀眾你哋大家都想去同佢再傾多啲計啊,但又真係時間有限。

Tong:係。有時間再上嚟喇。

Phyllis:唯有係咁喇。好,今日時間差唔多,送一首歌畀大家,下一集再見。拜拜。

- Part II 結束 -

- Part III 2008年7月18日 -

Phyllis:Hello,大家好! 大家睇緊嘅係《創世日誌》,我係萬斯敏,今日嘅嘉賓嘞仍然有我先生歐錦棠嘅。

Tong:繼續。

Phyllis:係吖阿棠,上次嘞講到你入咗呢個行喇,都好順利咁,但係嘞你自己覺得你自己係一個好,都幾灰嘅人喇,思想上面各方面,咁變咗你好多時睇咗啲唔公平嘅嘢就會唔開心。

Tong:嗯。

Phyllis:到而家你有冇改進呐?

Tong:誒…改進梗係有喇。

Phyllis:係咪仲係好唔開心定係點樣樣?

Tong:hmmm,你好多嘢你睇到都係會唔開心嘅,但另一樣嘢用個積極嘅方法去面對,或者你試圖去改變佢,如果改變有啲嘢真係改變唔到o架,咁你用另一個正面啲嘅方法去睇佢,去面對佢可能會更加好啲。

Phyllis:嗱,我知道你有陣時間就有憂鬱症喇,即係當然你無睇過醫生你都無證明你有憂鬱症。但係我見到…

Tong:證明咗。

Phyllis:真係證明咗啊?

Tong:睇過。

Phyllis:你真係睇過醫生? 點解我唔知?

Tong:睇完唔話畀你知。

Phyllis:但係嘞,嗰陣時我都好驚啊知唔知啊?

Tong:我知。

Phyllis:好多時候嘞,佢打電話嚟就話畀我聽:「我而家揸緊車,泊埋個車喺邊,但係嘞我就無喇喇就喊」,自己喺度喊。「咩事嘞?」「唔知。總之就係好唔開心。」

Tong:飲飲吓咖啡大庭廣眾飲咖啡,喊,做乜呐? 唔知。

Phyllis:幾時嘅事啊?

Tong:嘩! 04..05啊? 05啊係咁上下。

Phyllis:有無發生咩事令你咁唔開心?

Tong:好多嘢,其實呢啲嘢累積嘅,你話有壓力喇,或者自己…都係源於壓力喇。咁同埋我有問過啲醫療嗰方面嘅人喇,佢哋會話可能你內邊嘅內分泌同埋有啲嘢攪亂咗,會令到你咁嘅,所以我哋有藥物可以醫治到嘅。咁但佢話你又唔係咁嚴重。同我做過測試o架。

Phyllis:係,其實相輔相成嘅。因為你思維亦可以影響你身體入邊嘅內分泌喇,身體內邊嘅內分泌亦都可以影響你嘅思維。

Tong:咁人際關係又好差,好差! 唔想見人o忝嗰陣時,直頭同所有…同你就OK,但同所有嘅工作上邊嘅夥伴喇,所有嘢…我人際關係差到不得了。

Phyllis:其實你不嬲個朋友都唔係好多,就算你啲朋友嘞都係男性,你知男仔嘅喇,就算好好老友出嚟都係搭吓膊頭喇拍吓咁樣,就唔係話真係講心事。

Tong:唔講。

Phyllis:唔係好似女仔咁樣,乜嘢都劈劈啪啪講晒出嚟嘅嘛。

Tong:係。

Phyllis:係嗎?

Tong:係呀。

Phyllis:所以嘞,我知道你嗰陣時候又好難話去搵個人去開解你。咁收尾你點樣可以由呢個咁唔開心個局面跳番出嚟o架?

Tong:誒…唔講點樣辛苦法喇,我嗰啲嘢太detail,我唔想講,好辛苦。咁直到有一日,我應該係咪揸緊車嘞? 我應該係揸緊車。好辛苦。咁我就停低。咁我又係另一次,我有冇開口我唔記得咗。我真係同神講:「我唔想有呢個病,我唔想再係咁落去。」我求佢幫我,我淨係想去求佢幫我啫。我點樣可以解決所有嘅嘢嘞? 我知道靠我自己冇嘅喇。有啲嘢你要變咗要解決一個困境你要靠人哋嘅嗎? 即係佢對我要好我先至會開心番o架。咁嗰啲牽涉到人哋嘅嘢我點可以改變?

Phyllis:好難控制。

Tong:唔得。我求佢。我唔知用咩方法喇,佢一定得,我知道佢一定得。嗱! 就係咁奇妙。

Phyllis:就可以改變你嘅生活。

Tong:改變埋人哋對我嗰個態度。突然間嘅喎,突然間嘅喎。我自己又,我好似好釋懷,我放低咗啲嘢咁。咁我有冇事嘞? 我真係無事喇。咁我以前個負面嘅思想個負面嘅…

Phyllis:突然間冇咗。因為我哋嘅神嘞真係好有能力嘅。

Phyllis:阿棠你頭先講嘞,你靠住神你就可以令到你開心番喇,令到你個憂鬱症咁大件事嘞,其實係個好嚴重嘅病。

Tong:好嚴重嘅可以,係呀。

Phyllis:但係都可以霎那間,係咪霎那間醫番好啊?

Tong:誒…我真係唔記得咗,係咪一下子就無事,咁跟住慢慢嗰段好短嘅時期嘞,所有嘅環境所有嘅人,同我睇人哋、人哋睇我,都好唔同。即係同最差嘅情況已經扭轉咗過嚟喇。

Phyllis:我自己覺得信咗主,其實嗰個好大嘅改變嘞,就係你嗰個眼睛,同埋你對人嘅態度嘞係完全唔同咗。

Tong:你信佢o架嘛,你求佢o架嘛。呢樣嘢亦都係真嘅幫到你啫,肯放低自己。

Phyllis:同埋神要求人嘞,係模仿佢嘅樣式去做人。咁即係話究竟我哋好多時有困難嘅時候,耶穌點樣去面對嘞? 已做咗個榜樣畀我哋睇咗喇。咁所以其實你有啲咩嘢問題嘅時候不妨睇吓聖經喇,睇吓耶穌點樣去面對佢自己嘅困難喇,或者係有啲咩嘢事情啊,對人喇點樣睇。咁而家嘞? 你覺得你自己個生命內面已經完全喜樂啊? 定係都仍然間零中都有啲唔開心嘅事情發生你又會點睇嘞?

Tong:我成日都咁講嘅,即係基督徒唔係一個樣嚟嘅嗎?

Phyllis:係呀。

Tong:照住神,照住佢自己個模式去做人,但係基督徒唔會有一樣樣,十二門徒,十二個都唔同嘅性格喇。係咪? 咁所以我諗有啲嘢,天生嘅性格,有啲嘢改變不了嘅。咁但係,性格你改變唔到,但係你嘅觀點,你處事嘅方法你可以去改變嘅嘛。咁用呢樣嘢,譬如以前可能你係好憤世嫉俗,可能係悲觀,可能樂觀積極啲嘅方向去睇,你肯開放多啲自己,咁呢個世界又好唔同。

Phyllis:有樣嘢嘞我好想問你嘅,因為一路以嚟嘞我就好想好想你信主,我同你講嘅時候嘞又,其實我諗男仔都係喇,都會好抗拒嘅。咁但無喇喇神突然間話畀我聽:「你放手喇」咁樣,咁我真係放咗手喎,我覺得我交畀你喇,你幫我搞掂佢喇咁樣。咁真係,神可以慢慢逐步逐步令到你自己拿起本《聖經》嚟睇喎。我覺得真係好奇妙。有乜嘢喺你生命內面令到你自己去改變嘅嘞?

Tong:你記得o架! 就「昆」我第一次,用個「昆」字先呐,返教會。咁嗰陣時正規教會我都唔返,即係係要返「藝人之家」最最基本喇,即係但我哋唔好咁尷尬,係一個好好嘅地方嚟嘅。咁好返「藝人之家」我都唔肯嘅,咁嗰陣時又好吖,你記唔記得? 我哋大家合作做個音樂劇,我寫嘅,咁你客串其中一個角色。咁嗰首歌好難入嘅,因為前面唔知幾多個ba——,一入咗入去……你出場先,早過我。

Phyllis:我第一個出場,好驚!

Tong:你唱第二首歌。好喇,入到去,你好難掌握嘅,入得唔準。

Phyllis:係呀,排嘅時候都已經好有困難喇。

Tong:跟住唔知你同我賭,定係我同你賭:「你唱得準,我跟你返教會。」「好吖!」咁。「嚟啊!」嗰次真係神筆,無次準,咁我喺後台一聽,一開音一開口,我就話:「嘩,你駛唔駛準到咁啊?」

Phyllis:呢啲就係神嘅能力喇。

Tong:輸晒,輸晒!

Phyllis:投降未?

Tong:咁嗰次返第一次教會。

Phyllis:阿棠吖,你嘞就話其實你細個嘅時候嘞,你媽咪拜嗰啲偶像嘞,就好多時求佢希望發達,我要攞幾多萬咁樣,咁其實你好反對呢一樣嘢,但係同我哋而家呢個神,你覺得有啲咩唔同嘞? 你同佢祈禱嘅時候,你會唔會求佢:「唔該你畀我攞啲嘢喇」,咁你會唔會啊?

Tong:會嘅,會求佢,希望佢畀啲嘢我,畀啲咩嘢我嘞? 畀平安我。譬如有陣時你出外工作嘅時候,我知道嗰啲地方,我唔知道會係點樣發生,我希望可以保守你、所有人嘅整個行程。平時有陣時,我求佢畀一個好平安嘅心畀我,去面對一啲事情。咁成日會祈禱佢畀勇氣我,去面對一啲嘅困境。咁呢樣嘢我成日祈禱,當然我祈禱希望畀我屋企所有嘅人有健康啊咁,咁我會求呢啲嘢,呢啲嘢係我希望佢會攞到畀我。

Phyllis:如果萬一呐,你求嘅時候神唔畀你,咁你會點樣嘞?

Tong:我咪話咗囉,唔係話一定求就畀你嘅,嗰樣嘢係咪適合你嘞? 咁同埋我求嘅時候,我會話我點解要求呢樣嘢,我要問清楚我自己先,我會同神講:如果我攞到呢樣嘢,或者你賜一樣嘢畀我,將會對我,或者係對我嘅事業會有咩嘢影響,從而我會對人生或者對事奉,或者吓,唔一定關事吓,會有啲咩嘅好處,有啲咩嘅影響,我會自己思考咗先。

Phyllis:萬一唔畀你喇,可能會有另外一個原因嘅喎。

Tong:咁咪就係囉! 所以有陣時唔係話你想要乜,神畀乜你。

Phyllis:係喇,因為神最清楚一個大環境,究竟我乜嘢係最適合你嘅。我知道最近嘞,你又攞咗個空手道冠軍喇。

Tong:OSU!

Phyllis:都算係非常之震驚喇,對我嚟講。因為嘞佢係…

Tong:擔心我好耐……

Phyllis:係呀。因為已經係好少人,你算唔算係高齡?

Tong:我懷疑未check過,應該係最高齡嗰個嚟。

Phyllis:因為個體力各方面都好有限制。打拳真係要年輕力壯至得嘅嘛,吓? 你又日日都拍戲喇,又唔夠瞓喇。咁我記得你上舞台嗰一刻嘞…

Tong:擂台吖!

Phyllis:擂台吖,唔係舞台吖。上擂台嗰一刻嘞,你之前一晚係冇瞓到覺嘅,番通宵喎!

Tong:瞓咗兩個鐘頭。

Phyllis:係呀。咁係好唔夠瞓情況底下,你仲係一個高齡嘅拳手咁樣,你點可以,唔好話贏喇,就算係話應付到,即係見到其他之前有幾個嘞,一拳就已經畀人loi低咗。但係你竟然攞到個冠軍呐!

Tong:呢個係一個好大嘅奇跡喇,我覺得係。我好擔心。咁我你話參加比賽我最大嘅希望就考驗自己,咁同埋我希望實現番我咁多年嘅夢想。咁你話想唔想贏,我話唔想就呃你嘅咋。參加奧運會個個都想攞金牌嘅喇,咁唔係淨係志在參與,當然參與好緊要喇,即係enjoy過程好緊要喇。咁我好驚,亦都好驚受傷,因為如果受傷的話可能對身體可能有好嚴重嘅損害喇,影響我工作喇,諸如此類。我擔心到我係要,我喺我個網站嗰度係寫落去祈禱,希望所有人幫我一齊祈禱呢樣嘢,咁亦都係你同我私底下好多次祈禱,求神去保守我,直至我順利去過渡,唔好受傷。贏唔贏係其次。如果神願意的話,佢會畀我贏,我會榮耀佢。跟住你講喇,你好記得嗰一次……

Phyllis:返嚟至同你哋講。

Phyllis:講開嗰次你打擂台真係觸目驚心啊! 因為佢哋打嗰隻擂台嘞,就真係完全無保護嘅喎,唔會戴拳套喇,唔會戴頭盔喇,咩嘢都無保護。我心諗:嘩,如果真係打到流晒血或者毀容嘅話,咁你點做呢行啊? 係嗎? 好驚嘅! 之前睇咗咁多人真係一下就已經畀人lam咗喇。

Tong:K.O.咗喇。

Phyllis:咁你知唔知,佢嘞上咗台第一下,嘩好似吊威也咁,但係無威也吊……

Tong:係第一腳畀人踢喎!

Phyllis:第一腳畀人一yah,成個飛咗埋去個條彈弓嗰度。咁好多觀眾響後邊就話:「噢…搞掂囉…玩完囉」咁樣。

Tong:但奇,真係好奇,係唔痛嘅嗰腳。你諗下嗰個對手重我咁多,我都已經咁重喇,佢一腳我飛開,真係離地成個人。

Phyllis:成個真係吊威也喎。

Tong:唔痛嘅。彈番出嚟繼續打。有冇傷? 冇傷。之後冇事。嗰腳真係…我唔知點解釋喇。跟住又係慢慢反敗為勝喇,摸到個對手嘅路向,跟住就贏咗佢喇,跟住過三關喇,咁就贏咗嗰次嘅比賽。

Phyllis:嗰次我真係對你另眼相看喇。因為我覺得嘞,真係一拳一拳咁樣畀人打落去嘞,啲肉痛嘅嘛! 睇住佢,嘩! 流鼻血喎! 睇住佢流鼻血o架! 咁但係,啊點解可以捱咁耐嘞? 我覺得呢個意志力係好重要。但係當時你感受係點樣嘞? 你覺得你係完全係…個意志係喺邊度嘞?

Tong:無諗嘢嘅喇。第一,一定要有足夠嘅鍛煉先,無咗個鍛煉就唔好玩呢個遊戲喇;第二,上到嘅時候就空白一片,淨係專心我哋眼前嘅嘢,同我哋工作一樣,唔好有其他嘢諗。因為諗唔到嘅喇。點解佢出嗰一拳,點解起嗰一腳,已經唔係諗,唔係你嘅計劃內邊嚟嘅。我就好記得:當真係宣佈咗,即係打完最尾嗰個回合嘅時候,一宣佈咗,一拍呢邊,係我,你記唔記得喺台下邊見到我講乜?

Phyllis:感謝主。

Tong:感謝神! 係喇! 我估唔到真係畀我。

Phyllis:當時你點樣同神講o架? 你求啲乜嘢呢? 你求如果你攞到呢個冠軍嘅時候,你可以點榮耀佢嘞?

Tong:一切都係佢畀我o架,呢樣嘢基本上無咩可能喇。即係自己經驗唔夠,咁多年無…我上一次上擂台十八嵗嘅嘛。咁多年冇上擂台,鍛煉都係近呢兩年先至咁積極操練番,搏擊經驗唔夠,技術唔夠人哋,係嗎? 同埋加上自己個身份可能好大壓力。點贏啫? 年紀又大咗人哋咁多係咪? 而且重量級我係最輕嗰個仲要,基本上(個機會)微乎其微喇。

Phyllis:你點同神bargin啊?

Tong:我唔係bargin呐,我好想贏呢樣嘢,我好想贏呢樣嘢。贏呢樣嘢,如果佢肯畀我嘅,係榮耀佢嘅。係靠我,我個能力我做唔到嘅,佢願意,佢就可以畀到我贏。咁而家我贏到,我咪話畀人聽:係呀,你要信靠佢。佢唔一定要畀你贏喎,佢唔畀我贏,我一樣會好開心,因為我知道我盡咗力。

Phyllis:攞咗呢個經驗喇。

Tong:係喇。

Phyllis:我睇到阿棠你好唔同喇,我可以證明,以前你就係一發起脾氣上嚟嘞,嘩,真係不得了嘅。但係而家嘞,佢可以好靜好靜態,無喇喇塊面無咩動靜嘅喎,就話畀你聽:我好嬲喎。「吓? 你好嬲? 咁樣樣嘅?」我睇到嘞,神喺你生命內邊嘞,係改變咗好多好多。多謝你啊! 多謝你今日上到嚟同我哋分享你嘅生命,同分享神喺你身上嘅工作。如果有時間你再上嚟同我哋傾好唔好?

Tong:多謝!

Phyllis:OK,今日時間差唔多喇,下一集再見。拜拜!

- Part III 結束 -

- 完 -

-- 以上內容來自2008年7月4日、11日、18日 創世日誌 --