夏娃瑪莉亞
香港電台第二台
時間：2008年8月2日
主持：邱凱敏、潘兆聰
嘉賓：歐錦棠
收聽：Eva Maria - Part 1 Eva Maria - Part 2 Eva Maria - Part 3 Eva Maria - Part 4
-- Part 1 --
邱凱敏：咁其實嘞今日嘞，個直播室入邊好熱鬧，有唔同嘅朋友出現嘅。而家呢一刻嘞，原來你兩個識咗好多年嘅喇?
潘兆聰：超過十年。
歐錦棠：超過十年。
潘兆聰：肯定。無錯喇。我哋因為以前喺亞視嘅《今日睇真D》，咁阿棠係主持喇，而我嗰時係負責做writer。
歐錦棠：所以收尾我就打咗個突：點解突然間Edmond會突然間開咪，見樣吖，有陣時你見樣o忝嘛!
潘兆聰：係呀，有o架有o架。
歐錦棠：我哋幾乎身份調轉咁滯。
潘兆聰：有調轉到咩?
歐錦棠：冇，我冇寫到稿。
潘兆聰：係咩?
邱凱敏：呢part就有歐錦棠喺度喇，喺度喇。
歐錦棠：點嘛Anna?
邱凱敏：好耐無見你囉。
歐錦棠：少撞到囉。
邱凱敏：有一段時間我哋都會有合作吖，做下一啲…
歐錦棠：主持啊啲咁嘅嘢。
邱凱敏：淨係主持o架咋，我想無拍劇。
歐錦棠：從來都無拍過劇。
潘兆聰：佢有拍過劇，不過一劇就風行咗喇，哈哈哈哈。
邱凱敏：好喇! 我哋繼續番嚟。今日呢個節目…唔怪得之你無咁多朋友喇…
歐錦棠：我呢個沉默係咪好好啊?
邱凱敏：係呀。
潘兆聰：咦? 你有答案?
歐錦棠：我啲沉默，嗱，你估答案係點你自己估咋噃，我無講嘢。
潘兆聰：講笑咋，無嘢o架。
邱凱敏：嗱，邊啲係夠朋友? 呢啲無朋友做喇都，笑得咁開心，到而家重笑緊嘞。你多唔多朋友o架?
歐錦棠：我唔多。嗱，Edmond你而家咁樣翻吓我本舊帳，我而家我又翻吓單舊帳。你話一劇風行吖? 我就有個戲，你問佢記唔記得? 我曾幾何時打個電話畀佢，我要求佢喺我一部戲度做一個角色，記唔記得，Anna?
邱凱敏：我記得要唱歌嘅嘛。
歐錦棠：唔係，唔係，唔駛，唔駛啊!
邱凱敏：咁我有話好定唔好啊?
歐錦棠：你話好嘅。
邱凱敏：咁但係你跟住無搵我?
歐錦棠：唔係冇搵，我未郁啊嗰部戲。
潘兆聰 / 邱凱敏：噢，哈哈哈。
歐錦棠：你唔好理! 我個人就係話我有個Plan，我係終於我都會做嘅!
邱凱敏：其實嘞，因為我應承咗，所以佢就唔想做。我未應承嘅時候，佢就：哦哦OK，諗住你都唔會應承o架喇。應承佢就驚喇。
歐錦棠：邱凱敏，你唔好理。我會搵佢。我搵佢自然我有我個原因喺度。
邱凱敏：係呀，但係到而家都唔搵，亦都有佢原因喺度。
歐錦棠：係，因為我無錢拍。
潘兆聰：拍咩嘢啫? 文藝片?
歐錦棠：唔可能! 我又唔係彭氏兄弟，我拍乜嘢文藝片嘞?
潘兆聰：點解搵佢嘞?
歐錦棠：我拍一套叫Cats嘅中文版，因為邱凱敏似貓。
-- Part 2 --
邱凱敏：點解阿棠你會無咩朋友嘅嘞?
歐錦棠：我點解無咩朋友? 因為我個人係無咩朋友囉。我個人由細到大，由細個嗰陣時好孤獨吖，成日大部分時間都係一個人喺屋企吖，又唔準我落街玩、識朋友吖。形成咗我又好適應喎，我又好習慣喎。咁我又唔熱衷去認識朋友仔，又唔鍾意同人玩，鍾意同自己嘅玩具玩，或者同動物玩。
邱凱敏：但因為同你合作嘅時候嘞，你都會係一個健談嘅人嚟o架喎。
歐錦棠：你覺得係咩?
潘兆聰：我覺得係呀，見親你都係。
歐錦棠：唔係呀嘛……
潘兆聰：都係喎。
歐錦棠：你諗清楚先?
潘兆聰：唔係喎，你又(係)好多嘢講嘅人嚟嘅喎。
歐錦棠：喺咪前o架嘛! 鏡頭前面o架嘛! 同埋講衰嘢囉，搞吓氣氛咁樣，自己…吓。丘凱敏碌大雙眼，你諗清楚，我真係好多嘢講?
邱凱敏：嗱，我諗得好清楚嘅。你唔係叫做多嘢講。咁因為譬如多嘢講嗰啲就阮兆祥啊，吳家樂啊，錢嘉樂呢一啲。咁就阿棠其實佢係有嘢同你講，未至於係喺咪後邊完全陌生，各行一端咁樣個喎。我覺得起碼都會問吓近況吖，都有啲嘢傾吓。
歐錦棠：咁即係證明你喺我眼中即係有某個位置，我肯同你講吓呢啲嘢，好好嘅喇。我真係會同某啲人？？陌生各行各路，一cut機就走開，我可以做得到嘅。我係咁嘅喇。
潘兆聰：係有牙齒印嗰啲?
歐錦棠：唔係! 無牙齒印，無印。但係我可以咁，我唔鍾意，即係講多句都嫌嘥氣，我會係咁嘅。
邱凱敏：咁有冇試過啲人因為咁樣，而話過你?
歐錦棠：吓? 唔駛因為咁都可以話過我喇……即係好得意嘅，我唔知，我唔記得幾多年之前，即係有啲人即係為我好嘅：「喂，你唔好咁串喇。」「吓? 我串咗啲乜嘢吖?」「某某監製話你乞人憎乜乜乜」「但，咦? 佢冇用過我嘅噃!」「係囉! 冇用過你都覺得你乞人憎。」我話「點解?」「你行過，你耷低頭，你唔睬人嘅!」咁我覺得「吓? 咁我睇唔到佢我冇計o架!」睇到有陣時「死喇! 呢個邊個嚟嘅?」我諗唔到。咁我又冇計o架。即係會咁樣囉。
潘兆聰：但其實係，唔刻意去做呢件事，但係都畀咗個咁樣嘅印象人。
歐錦棠：咁又係嗰句：冇計o架。
邱凱敏：因為我唔知譬如呢，喺我嘅認識當中喇，認識嘅過程當中，同埋甚至乎喺報紙上，我都好少見到話阿棠同邊個唔咬絃喇。我有時見到佢，even同幕後可能未必話打成一片，但都有啲計傾啊，傾兩句呀咁樣啦。我唔覺得你個人係咁樣個喎。
歐錦棠：吓? 係咩? 咁唔係咁。Edmond都記得嘅。譬如就算我嗰陣時同幕後都會傾吓。
潘兆聰：係呀係呀。
歐錦棠：因為嗱，工作人員好緊要嘅! 大家嗰個工作上邊嗰個溝通係好緊要嘅，我覺得。
邱凱敏：係。咁但係partner都好重要個喎。
歐錦棠：係呀。
邱凱敏：咁所以你有陣時都要同其他partner有所交流。
歐錦棠：有，盡量囉。咁有啲人真係正所謂，我成日都覺得雖然人隔人緣，其實做嘢，嗱，我個人就好「懶」嘅。懶係懶喺咩嘢嘞? 即係話我，啲人成日話，做嘢就做嘢喇。咁我唔係嘅。我做嘢呢，我額外要求多啲嘢。咩嘢叫懶嘞? 我希望做嘢開心，開心咪就relax，relax就唔駛咁辛苦，呢啲咪懶囉。咁我所以呢，就做嘢我希望大家開開心心嘅，輕輕鬆鬆嘅，最好就係做到咁喇。咁但有啲人，會發覺原來係唔得嘅。硬係搞到你好多壓力啊，你又好唔舒服啊咁，咁所以嗰啲我就會畀？？？？我會，我會選擇咁。
邱凱敏：喂，唔多朋友，都唔等於冇朋友。
歐錦棠：梗係喇! 我有好朋友o架，我都有若干好朋友o架。
邱凱敏：咁你有冇試過，即係對朋友一啲真係赴湯蹈火嘅經歷?
歐錦棠：吓?! 咁我又唔記得為佢做咗啲乜嘢囉。即係我成日都會覺得好彩嘅，朋友要搵我咁樣幫就真係好少可嘅。咁錢銀上面有啲會有囉，即係你，嗱，我就試過咁樣：急需，真係要搵錢銀幫嘅，佢又唔係要求多，即係要幫囉。幫咗之後，我好慶幸我幫過佢，咁過咗個難關，我睇到佢，跟住然後嘞，即係睇住佢喺個事業上面喇，生活上面喇，佢一路進步，我戥佢好開心嘅，咁嗰D我發覺，我冇幫錯佢。咁即係睇住佢真係去做一樣，去做好呢件事，咁我幫得好抵嘅。咁亦都試過因為呢樣嘢嘞，我畀人喺感情上面出賣過，即係幫咗過喺金錢上面，噢! 原來唔係個喎，攞去玩個喎，真係胡天胡地。咁嗰啲我覺得(被)出賣咗。咁以後，因為咁呢，就算even你還咗錢畀我啊，我都係冇朋友做嘅。
-- Part 3 --
邱凱敏：繼續有潘兆聰喇，同埋我哋嘅歐錦棠，阿棠喺度喇。
歐錦棠：Maria~~
邱凱敏：係呀。
潘兆聰：上身喇開始係嘛?
邱凱敏：嗱嚟緊你將會有個舞台劇啦。呢個舞台劇其實之前都已經公演過係咪啊?
歐錦棠：1月嗰陣時做過喇，跟住4月嘅時候去咗加拿大嗰邊掃咗兩個埠喇，而家返番嚟第三次做。
潘兆聰：嘩，幾好喎，成績唔錯喎，反應幾好。
歐錦棠：反應好好! 但成績嘞，我好老實講，就真係嘅，你睇網上邊啲人，我都寫blog嘅喇，10個寫，10個都係鍾意嘅，係讚嘅。咁但係又奈何，即係唔知係唔係因為「歐錦棠」呢三個字嘞，即係佢哋可能覺得：咦，你做戲，咦，但呢個棟篤笑喎，歐錦棠係咪做棟篤笑o架? 不嬲都唔係嘅喎，咁。棟篤笑我哋有好多傑出的人物喇，咁但係點解會係你嘞? 可能佢哋有個重係試探嘅心理，就未如我心目中達到個理想。
潘兆聰：你嘅理想係到邊度?
歐錦棠：咁你做親台嘅，梗係希望場場爆嘅喇咁，我未試過係場場爆。黃子華做到呢樣嘢。
邱凱敏：但能夠再次公演已經係好好嘅成績嚟嘅喎。因為香港嘅舞台劇雖然而家廣泛咗，但未至咁普及嘅嘛。
歐錦棠：誒，會做多次製造個負擔嘅風險喺度喇，高生都會計數喇，咁同埋佢話，呢個劇要晚晚爆，晚晚爆個意思即係話，可能其實都有若干樣我哋係制肘到嘅。
邱凱敏：例如?
歐錦棠：誒，呢個(係)外國嘅百老匯劇嚟嘅。咁有製作公司好嚴謹咁去審批每一樣嘢，poster、宣傳嗰方面、嗰劇本嘞，佢都好緊張，即係要跟足佢哋嘅規格，因為美國人做嘢……香港我哋搞舞台劇，我哋好興將我哋樣整晒落去呀，影啲好靚嘅劇照啊，有個設計咁。佢唔得，係跟佢嘅方式：卡通畫嘅。咁呢樣嘢可能會蝕底啲囉。咁宣傳字眼上邊你唔寫得太多嘅嘢落去啦，即係佢有格式嘅，佔幾分之幾，嗰size係幾多，佢都會規範埋。所以呢樣嘢真係要，唯有要靠口碑。咁會變咗係做得辛苦啲，做多幾廿個percent嘅嘢落去自己要。
邱凱敏：但滿足感又會唔會大啲嘞?
歐錦棠：其實咁嘅，我真係做咗超過10年舞台劇。個個都話做舞台劇啊，滿足感好大啊，因為即場反應。咁我又好奇怪，我做咗咁耐，我從來都未覺得有呢樣嘢。
潘兆聰：點解嘞?
歐錦棠：吓? 點解因為冇啦。即係個個…
潘兆聰：畀唔到你啊?
歐錦棠：當嗰啲人話有嘅時候，發覺講啲人個個都唔係做舞台劇嘅，佢哋想當然以為係咁之嘛。
潘兆聰：係咩?
歐錦棠：我就唔係啦。我做嘅時候我就冇呢啲反應嘅。嗱，我最大反應嘅時候就係無觀眾嘅時候。
潘兆聰：咁…唔會啫。係咪真o架?
歐錦棠：唔係啊! 無觀眾嘅意思即係話，我自己一個人企喺台上排練，對住個空嘅觀眾席，我自己喺度練嘅時候，呢個我自己係最開心嘅嗰陣時。因為我做緊戲嘅時候，我係唔會理嘅喇。其實好得意嘅，嗰個情況就係interactive嘅觀眾會畀個反應你，會刺激到你，你跟住會畀番多啲落去又刺激番，一個cycle。但係呢個唔係叫滿足感囉，呢種只不過係一種刺激囉，佢畀掌聲又好，佢噓又好，你影響唔到我幾多o架咋。嗰滿足感不係喺呢一度。
潘兆聰：嗰滿足感從邊度嚟?
歐錦棠：滿足感喺成個過程嗰度，之前仲係要之前。之前排咗幾多，戥咗幾多心機落去，研究咗幾多嘢同啲工作人員，最後出嚟嗰個成果就係演出喇，演出咗你睇到個效果好唔好，咁你就知道有冇滿足喇。但係係基於喺之前嗰度嚟。
邱凱敏：咁即係話其實你唔係好享受喺台上嗰表演，而台下有好多對眼睛望住你嗰一霎那。
歐錦棠：唔會享受嗰樣嘢o架。我係享受排練嘅過程，排練係最緊要嘅。因為呢樣嘢可貴就在話，我哋成日做電視呢，都唔會有呢樣嘢。即係話我可以擺充足嘅時間，基本上叫充足嘅時間，去將一舊嘢由0，我希望至到100。有陣時唔得嘅，真係講真，真係去唔到100嘅。咁盡量將佢磨到最靚，省(?)到粒粒靚，拱(?)出嚟畀觀眾睇，我哋好希望做到咁。咁即係舞台劇可以賦予到呢個喺度。觀眾畀番你嗰種反應之後，啊，你睇到觀眾好鍾意啊咁，嗰種滿足感，咁多千百對眼睛望住你嗰種滿足感，咁呢樣嘢我感受唔到嘅。咁有啲嘢so hard，我哋做咗一樣嘢出嚟，係好多人望住你，但可能佢欣賞唔到嘞? 可能佢未入去嗰個程度欣賞，或者甚至佢唔欣賞嘞? 咁係咪代表你就唔會滿足嘞? 又唔係。
潘兆聰：都係嘅。
歐錦棠：咁我喺個過程嗰度，我哋係擺咗嘢落去，觀眾只不過可能接受唔到，又或者係我哋嘅表達方法有問題之嘛。但係喺個過程嗰度，如果你係帶足落去嘅，我哋唔會miss咗任何一樣嘢o架。
潘兆聰：咁可能我哋認為佢可能應該係嗰一刻滿足啫，其實我哋賦予咗一個咁樣嘅角度喺你哋身上面囉。
歐錦棠：所以有陣時演出嘅時候，我就唔會有太大嘅期望喺內邊。
-- Part 4 --
潘兆聰：你有冇做舞台劇?
邱凱敏：我當然冇喇。
潘兆聰：我做過喎!
邱凱敏：幾時啊?
潘兆聰：我以前喺另一間電台嘅時候，佢有個唔知幾多周年嘅…
歐錦棠：音樂劇嗰類啊…
潘兆聰：好長。排咗一段時間，都叫做做過吓。我覺得幾好玩個喎其實做舞台劇。即係如果當下你唔係做緊你自己講嘅對白喇，或者嗰個focus唔係on你度呢，但你都on stage做緊其他嘢嘅說話呢，其實你唔好以為冇人見到你，你都要好努力哋去掃吓垃圾啊，喺度自己篤定扮講嘢，原來係要呢樣嘢個喎!
歐錦棠：我話畀你聽：呢樣嘢係好邪嘅。以我為例，甚至乎收尾我問番好多身邊嘅人都係嘅，就算一大班群眾演員喇，最唔做嘢嗰個呢，就偏偏畀人睇到喇。你想搶鏡得嘅喇，你唔做嘢就得嘅喇。做粵劇我見到有人嚼香口膠啊!
潘兆聰：唔係啩!
歐錦棠：我見到過。嗱，我就係睇到個所謂梅香嘞，就冇嘢講嗰啲嘞，我就睇到喇。
潘兆聰：佢攞個香口膠出嚟食?
歐錦棠：唔係啊，口度(模仿動作)我睇過。跟住有啲譬如唔做表情啊，喺度hea住隻腳，前後腳咁企嘞，好hea嗰啲技法嘞，唔得嘅嘛! 粵劇要挺到直晒咁。偏偏呢啲咁嘅偷雞嘢就會畀我哋睇到，永遠都係嘅。所以你真係喺上面任何，你行出個台一步，你冇得偷雞嘅。
邱凱敏：係，你打醒200分精神o忝喇。喂，不如你講吓你呢個舞台劇啊，當中嘅角色似唔似你啊?
歐錦棠：唔似我。因為其實每一次演都唔會係我。但係嘞又好矛盾哋，每一次我都要喺我內邊攞啲嘢砌落去，咁先至會成為我演嘅角色，即係我每一次都係用呢個formula嘅喇，一定係嘅喇。咁尤其今次砌多啲嘢落去，講夫婦關係，即係男女感情關係。好多嘢我借咗我老婆嘅嘢擺落去，即係內邊其實我做好多角色嘅，我做應該超過十幾個角色喺內邊，大部分就係我同埋一個女人就係我老婆喇。咁呢個老婆就唔係，劇本寫個老婆就梗係唔係我現實生活個老婆，唔係嘅嘛。但我砌咗落去，我連個名都改埋落去。
潘兆聰：係呀?
歐錦棠：用番我老婆(個名)「阿敏」。我鍾意啲人叫阿敏，你知唔知啊?
潘兆聰：噢~~ 係咩?
歐錦棠：係呀。
邱凱敏：我知呀。唔係凱敏呐不過。
潘兆聰：噢，原來你搵佢拍電影就係咁嘅原因。
歐錦棠：所以點解我有一部戲，即係我又等緊睇嘅就係《最後的蘇格蘭王》因為佢講非洲狂人「阿敏」我又好鍾意。
潘兆聰：即係天生鍾意呢個字?
歐錦棠：趙敏又係我好鍾意個角色。
邱凱敏：返番嚟，講番呢個舞台劇。
潘兆聰：Okay Okay~ 我講緊係邊度啊? 哈哈! 即係「出賣」自己一啲嘢，將老婆一啲嘅生活嘅細節，佢一啲習慣，對咗佢咁多年，搬咗落去。因為我要扮女人嘅嘛，我個女人咪係佢囉。
邱凱敏：但其實你太太你搬上去舞台上嗰啲，會唔會你覺得係好多嘅女性都會同樣有呢一種嘅問題?
歐錦棠：係呀! 完全咁嘛!
潘兆聰：例如嘞?
歐錦棠：好多嘢唔駛例如。你而家要我列舉例證…
潘兆聰：最嚴重嗰樣係咩嘢?
歐錦棠：好多嘢好嚴重個喎。
潘兆聰：係?
歐錦棠：即係例如女仔一見到面嘅時候，我哋男人：「喂，阿聰，點嘛? 近排點嘛?」真係會咁之嘛樣，係咪先?
潘兆聰：係呀。
歐錦棠：我哋唔係成日見面。上一次喺某個網絡個電台度見到面「喂，點嘛?」
潘兆聰：係喇係喇係喇。
歐錦棠：係咁，寒暄兩句跟住就握下手，跟住就介紹下某某啲新同事畀我識，冇嘅喇。咁係咪代表我哋冷漠? 嗱，真係唔會覺得有咩嘢冷漠啊或者唔舒服。
潘兆聰：係呀。
歐錦棠：女仔就唔會咁嘅嘛。
邱凱敏：因為兩個唔係太熟囉。
歐錦棠：但係好陌生囉，我又覺得。
潘兆聰：又唔係陌生個挺囉。
邱凱敏：呢啲係有禮貌嘅招呼囉。
歐錦棠：Okay...
潘兆聰：女性會點呢?
歐錦棠：女性就犀利喇! 即係頭先我哋嗰啲對話擴大100倍。點解女仔硬係好鍾意…你留意下，我哋喺茶餐廳食食吓嘢，只要隔籬台有一班女生喺度呢，你就會無端端聽到ka..細細聲，跟住kakaka，然之後一定要拍手喎，「哈哈哈」…係喇。
潘兆聰：就係咁喇。
歐錦棠：點解要拍手嘞? 你哋有咩咁高興，跟住講嘢笑，又係kakaka…好開心。但係，干笑嚟嗰啲係。我哋覺得，點解會咁? 污染緊我哋周圍嘅生命。會咁樣囉。呢個(係)其中一個例子，一個範例。
邱凱敏：但你覺得真係呢樣嘢係男女有別?
歐錦棠：吓?
潘兆聰：即係男仔唔會咁樣係嘛?
邱凱敏：我覺得唔係喎。我都聽過一班男仔喺隔籬…
歐錦棠：少，一定係少。同埋嗱，男人，譬如我有個好朋友，我諗我好朋友大家都識嘅，Eric So。啊? Eric So，Designer。我哋好好朋友，駛唔駛成日打吓電話問候啊? 唔駛。出嚟食飯，我哋好多時出嚟食飯，我哋會講一啲我哋想搞嘅project上邊嘅嘢，或者某啲八卦嘢都會講，跟住冇嘢。大部分時間我哋可以係沉默，我哋飲咖啡就係飲咖啡，我哋兩個人對住飲咖啡，我哋好享受，我哋成日飲咖啡，飲咖啡講呢講路，講完之後我哋又冇嘢，我哋就係齋飲咖啡，咁就得嘅喇。你試吓同個女仔出嚟齋飲咖啡，佢唔講嘢。你睇得出佢，第一佢耐煩，第二佢想走，第三以後都唔見你。
潘兆聰：會唔會呢?
邱凱敏：你係唔係嘞? 你同你啲朋友，嗱因為我係女仔…
潘兆聰：可以靜嘅，可以冇乜嘢講都得。即係一定係有啲情況係dead air嘅，係容許嘅。即係男仔我覺得咁，但某程度如果同女仔，真係會顧及佢嘅感受，佢又唔講嘢…
歐錦棠：唔係呀，甚至乎有陣時男仔「喂，睇場戲」「好喎」睇場戲，飲杯嘢喇，食完飯之後冇嘢做喎，我哋嗰樣嘢就係想話accompany「喂，你陪吓我我啊」或者「我陪吓你啊」之類，唔駛搵話題講o架。你試下搵個女仔吖嗱，你就咁同佢一日，你試吓唔講嘢，我淨係想你戯我側跟啫。你估佢頂唔頂得順吖嗱? 你得唔得?
邱凱敏：如果係我男朋友嘅話嘞，會有呢個情形出現，因為大家有一個情形真係只要個陪伴住，咁唔需要成日每一分鐘見面都講嘢嘅。但如果係朋友嘅話嘞，某程度上自不然就會有多啲嘢要交流。
潘兆聰：其實要交待，可能係。即係點解唔講嘢，會唔會係特登搵一啲嘢嚟填補。你有冇一啲真係好friend嘅女士可以咁樣會過一日嘅嘞?
歐錦棠：呃...女性的朋友我都有唔少，但我從來唔會選擇要佢哋咁樣同我做呢樣嘢囉，唔會。因為我知道唔得嘅嘛，佢哋唔會嘅嘛。所以我只不過會搵番男性嘅朋友去做呢樣嘢。即係女性嘅嘢，你係要有目的嘅，嗰種目的即係話，我想同佢去睇場戲嘅啫，或者我想同佢食餐飯，食餐飯講吓嘢，咁就消磨咗個時間，或者我想同佢傾一啲嘢做一啲嘢，傾完嗰樣嘢咁就算嘅喇。冇呢種目的喺度支撐嘅話就唔好叫個女仔出嚟。
潘兆聰：同意。正如啲men's talks同girls' talks嘞，嗰個形式係咁樣喇，可能係。女仔同女仔係可以咁樣嘅嘛，可能會咁樣。
邱凱敏：不停講嘢。
潘兆聰：不停講嘢，或者可以有啲咁樣嘅空間囉。但男嘅可能係唔一樣嘅。
邱凱敏：因為其實嘞，我而家喺考慮當中就諗番譬如，我同一啲嘅異性朋友，佢哋真係異性朋友而唔係男朋友出街嗰陣時候，我哋嗰相處係點? 究竟佢係咪因為我成日講嘢而遷就我囉。我而家就不停喺度諗緊嘅。我覺得都唔似好係喎，大家睇完一場戲之後，都有好多唔同嘅見解啊，都唔係為咗填補dead air而去搵啲嘢充…
歐錦棠：睇吓你嗰啲係咩嘢朋友咋。有陣時有啲人即係物以類聚嘅。即係譬如你識開嗰啲朋友，可能佢哋喺某方面，男仔都會有啲好鍾意嘰嘰喳喳咁，都會有嘅嘛，係嘛? 所以你可能係識啱呢類朋友。咁啱嘅，佢真係會鍾意同你講嘢囉。又或者佢哋有某啲purpose你唔知咋。
潘兆聰：我諗冇嘅喇。佢已經係有咗主嘅喇。
歐錦棠：咁可以變嘅嘛。so what? 真係啊。
邱凱敏：喂嗱，如果咁樣講嘅話嘞，你en唔enjoy做個男人呢?
歐錦棠：吓? 我不嬲都enjoy我做一個男人。喺我老婆眼中佢會覺得我係個女人。(笑)
潘兆聰：點解? 因為你平時啲生活嘅細節係好婆乸嘅?
歐錦棠：曾經試過有啲同事形容我係一個女人嚟嘅。佢會覺得同我相處會好，因為佢覺得我唔似一個男人。(笑)但我唔覺得我乸型。
潘兆聰：我諗唔係話乸型嗰樣嘢o架係嘛…
邱凱敏：但佢man啲啊因為。
歐錦棠：唔係啊，又唔係啊。有某啲女性嘅細節我會有喺度嘅，有嘅。咁所以，得o架喇，我理解到女仔會係咩嘢回事，除咗生理嗰度我完全唔知嘅話嘞，其他嗰啲某部分我諗我理解到女仔係咩嘢回事，我感受到。但我好enjoy我做一個男人。
邱凱敏：嗱，好理解嘞。都會將一啲自己太太嘅性格擺咗喺你個舞台劇當中嘅。咁其實一路以嚟我哋都未講幾時公演喇，不如呢個時間等你講啊。
歐錦棠：啊，呢個就真係，八月，嚟o架喇喎! 奧運前嘞，我哋係6號第一場，跟住9號啊、13號啊、15啊17，同埋最後一場，我哋加咗一場18號嘞，喺紅磡理工嘅賽馬會綜藝館嗰度嘞公演嘅。
邱凱敏：咁到時大家就要留意住阿棠嘅演出喇。
歐錦棠：你都要嚟睇啊!
邱凱敏：好喇，今日唔該晒你!
歐錦棠：多謝!
邱凱敏：拜拜!
潘兆聰：拜拜!