發現新大陸 文化篇 Discover Mainland
商業電台 雷霆881
時間：2010年6月27日22:30-23:30
主持：譚艾敏、Joyce (DJ)
嘉賓：歐錦棠 (棠)
收聽：Discover Mainland - Part I Discover Mainland - Part II Discover Mainland - Part III
節錄：
- Part 1 -
DJ：我哋一陣間就搵嚟《死佬日記》歐錦棠同我哋傾計，講下佢呢一套舞台劇究竟係點樣就係由一啲好野性嘅男人，好原始嘅男人，去睇男人同女人嘅。一陣間我哋同佢傾啊。
DJ：好喇，介紹我哋今日嘅嘉賓先，咁就係歐錦棠喇，阿棠。因為佢有呢一套嘅舞台劇，亦都可以叫棟篤笑喇應該話，就叫《死佬日記》嘅。
DJ：不過今日有啲特別，因為阿棠唔係單單一個人上嚟，而係帶多咗一位好有份量嘅嘉賓上嚟嘅，等佢介紹下自己先喇。
棠：- 各位香港嘅市民，大家好! 近排呢好多風風雨雨，香港市民同我一齊渡過，亦都好多民意嘅支持。我太太嘞就成日笑我嘞過唔到下半場吓，但係嘞過唔到下半場唔緊要，我覺得最緊要過到下半世。所以嘞，大家要投票支持我，我係爭你哋一票，一票，係六百萬人每人一票。
DJ：嗯，不過過咗o架喇，呢個政改方案。
DJ：係啊。阿特首! 真係好鬼神似!
棠：唔係，我係真嗰個「凸首」，凸額嗰個特首我意思係。
DJ：凸咗個首出嚟?
棠：凸咗個額頭個「凸首」。
DJ：係，「真凸首」。
棠：大家好啊!
DJ：我哋就之前睇咗你呢個死佬日記，現場睇咗。咁你頭先扮曾蔭權嗰幕就真係無嘅。但係嘞，我真係發覺嘞，你可以聲演到好多唔同嘅人嘅聲，有無做過統計，你響入邊扮咗幾多嘅聲嘞?
棠：廿零囉。
DJ：廿零?! 男人都有唔同種類嘅...真係犀利，我有時扮男人聲，扮小朋友聲，通常可能扮一兩種o架嘛。但真係可能男性嘅豬朋狗友可以四五種囉已經係。
棠：我最鍾意扮係阿金剛叔。
DJ：金剛叔? 喂，嚟吖嚟吖。
棠：-「鬍鬚仔，點嗎?」
DJ：哈哈哈哈，好嘢好嘢! 今日好多人上來喎，大家都撐場喎。
DJ：我哋講返你呢套舞台劇吖，叫《死佬日記》，英文名就叫CAVEMAN嘅。
棠：係。
DJ：咁我睇過宣傳單張就話呢個百老匯最長壽嘅棟篤笑，咁我估嘞吓，CAVEMAN係咪就來自真係翻譯過嚟，即係原意個概念，就翻譯過嚟?
棠：係。
DJ：咁但係入邊嘞，好多都係你嘅嘢嚟嘅。
棠：誒.. 〇七年第一次演，咁嗰陣時高志森監製，佢已經搵我做，掟咗個劇本畀我睇，CAVEMAN，嗰時未有翻譯嘅，就係原創英文劇本。因為佢話(呢個係)最長壽嘅百老匯棟篤笑，即係喺百老匯做超過咗十年啦。睇完劇本之後，我睇埋兩個演出嘅版本，兩個版本睇完之後，我覺得：死喇! 點解我唔識笑嘅!
DJ：係會唔會係當地嘅文化...?
棠：當地嘅文化原來同我哋嘅差異就好大啦! 當地嘅觀眾，(喺現場錄啊)佢哋睇得好開心，睇得好好笑。咁當然有D位我哋覺得有共鳴嘅，譬如講男女關係嘅嘢，全世界都大同嘅喇我覺得。但係有D所謂jokes同佢哋當地嘅生活嘅文化好有密切關係，你就咁照講出嚟呢死梗。我嗰陣時有D擔心，睇吓有D乜嘢可以加本地嘅元素，呢個首先要開會通過先，大家傾囉。
DJ：後尾大家協商咗，都OK...
棠：係，覺得係要嘅，因為睇過之後真係覺得，hmmm，香港人如果就咁講，係唔會明白嘅。
DJ：嗱，呢套劇嘞其實都係由一個男人嘅角度，去睇男人同女人啦。咁但係好多情況，點解叫CAVEMAN嘞，洞穴生活嘅人，其實比較原始人嗰啲方式，即係點樣套用返原始人嘅概念去返現代嗰度。咁你頭先就話，個劇本就由外地咁嚟，但後尾你哋就經過啲思考就改成一啲本地化多啲。咁你覺得外地嗰套同香港嗰套，可唔可以畀啲例子，係有啲咩唔同嘅嘞? 男女方面，嗰邊嘅相處係點樣? 香港其實就真係唔work嗰喎。
棠：嗱，呢樣嘢就反而係無乜嘢唔同嘅。但嗰邊，男人好鍾意講football吖，講揸車去遊車河吖，香港遊車河都有，不過其實係少啲。例如佢哋喺相處嘅時候，喺屋企，佢哋會有後花園，喺後花園度做過啲咩嘢呢，譬如有棵樹，有棵樹度搞咩嘢呢，咁香港你有幾多個人有呢一個嘅...
DJ：...好有錢嗰啲。
棠：係啦，所以呢啲我哋喺個環境方面唔講得喇。譬如釣魚，佢成日都有提釣魚。我哋初初諗，香港有幾多人會釣魚呢? 咁好彩，即係近呢幾年開始多咗有叫「釣友」嘅，都成為一種細細哋嘅風氣，唔係話你講釣魚有人會覺得奇怪嘅。咁我哋覺得，好喇，呢個可以保留喇。因為有啲嘢同佢哋版權嗰邊爭拗，有啲嘢佢哋好堅持一定要保留喺度。
DJ：釣魚都有，譬如有時我哋去黃合石碼頭見到成班阿叔喺度喇。有時講嘅時候都聯想：係喎，有阿伯阿叔唔知去做咩...
棠：唔出聲唔講嘢...
DJ：係咪真係男人之間相處方式就一定要搵啲活動出嚟嘅嘞? 而唔可以好似女仔咁，我哋出嚟傾吓計喇，傾吓心事啊...
棠：唔係，即係咁講喇，好多嘢其實我哋誇大咗，將樣嘢極度誇大咗嚟取笑呢件事嘅，或者係反諷一啲事情啊咁樣。男人坐埋唔講嘢，無可能喇! 喺酒吧嘈到...男人點唔講嘢，大大聲咁講嘢o忝。不過就係話，即係好多時男人就係，個話題真係可能無女仔講嘢咁精彩，個範圍咁廣闊。
DJ：咦，你褒返我哋喎。
棠：吓? 褒返呐? 因為其實之前我都踩得太過分喇。其實CAVEMAN佢有兩個名嗰喎——如果你要英文的話，佢版權有兩個名嗰喎——一個叫CAVEMAN，穴居人呐，即係洞穴人呐；另一個就叫Defending the Caveman，即係為洞穴人辯護嘅。所以呢，話就話兩性溝通，其實嘞，幫男人講說話嘅。
DJ：但入邊其實分析咗男人係野人，我哋女人好似話男人未進化...
棠：野蠻人，粗魯...
DJ：...好多嘢都係從自己個欲望開始嘅嘛。再分析番男人響個原始人嗰度就扮演一個「狩獵者」嘅角色，咁女人就係個「收集者」角色，舉好多例子，同人打招呼啊，買嘢，傾計，玩遊戲、答問題呢啲，其實大家都好唔同。但你自己呢? 你自己喺入邊中咗幾多樣?
棠：好中o架!
DJ：中曬?
棠：唔係，唔一定係中曬，而係話我會明白點解會咁，真係咁樣囉。即係嗰晚第二場嘅演出(6月20日)，啱啱係父親節，咁嗰晚我演出之後，謝幕嘅時候有啲感觸嘅，因為嘞，呢個題目我都主要都係企喺男人嗰邊幫男人講說話多啲。就係最尾嗰度點題咗，成套戲最尾就話：男人，我引證番好似穴居野人咁樣，點樣終其一生，佢都係為自己家庭、佢嘅仔女、佢嘅妻兒去奔波勞碌。即係男人，真係，尤其係中國男人，佢哋唔識得表達自己嘅。供書教學，如果有啲富裕嘅時間，陪下你去街係好照顧嘅一件事。即係我唔覺得咁樣係最理想同埋啱o忝，但係事實上我哋呢兩代我哋睇我哋嘅父輩，佢哋都係咁樣生活嗰喎。所以我覺得作為仔女嘅，作為妻子嘅，你可唔可以睇番呢樣嘢嘞?
DJ：你講咗話男人唔係好識表達自己，喺套劇中間，你有一段同觀眾互動嗰part嘞，你就喺度講，話：阿男人都係，嗰啲咩街吖...
棠：吓吓。
DJ：係呀，粗口，即係問候嗰啲囉。你講到話：啊，如果你講女人係賤娃，女人就會大反擊喇咁。但係再引用番次話男人係咩街嘅時候，全場男人都係無出聲。
棠：真係無出聲o架。
DJ：場場都係無出聲佢哋?
棠：係，係! 嗱，我做過好多場喇，計埋之前嗰啲，今次第五次喇，場場都係去到呢一part無人出聲。
DJ：咁去到中間一啲位嘞，你都會同台下啲觀眾對答，咁甚至就用粗口互相問候大家。咁以你喺台上個講法嘞，用粗口去問候大家，大家都係男人嘅話嘞，係無問題嘅。
棠：係。
DJ：大家係friend。
棠：嗱，呢個我唔會破格嘅，我唔會對女性觀眾做呢樣嘢。當然嗰種，即係我諗聽眾有啲可能會誤解，我哋用粗口問候大家嘞，唔係你所想象到嗰種粗口問候大家。
DJ：即係唔係照字面譯嘅?
棠：真係唔係嘅，後邊有其它意義，用個意義，去特定某個環境，咁樣嚟配合先至問到大家嘅。
DJ：即係其實係大家都係問候，友善地問候，不過中間就加咗啲粗口嘅字眼啫。
棠：係喇，呢啲成日(都有)，日常生活我哋都會聽到見到咁樣嘅情況。
DJ：我都見到好多情況，鄙台都唔少，哈哈哈。...有個拍檔，佢無做喇，咁突然之間佢有一日就喺facebook留言，佢就話：無人同我一齊爆粗口，好失落啊。咦，你係咪真係咁大癮喇講粗口。男人有時講粗口可能表達啲大家互相支持嘅情感嘅時候，嗰吓明曬。
棠：係喇。
DJ：嗱，大家都估到呢個DJ係邊個o架喇，又有做下《串》啊，又有做下老人節目啊...哈哈哈哈哈。咁但我就想問，你當時就喺台上同現場觀眾用啲粗口去互相問候，會唔會驚真係有個觀眾突然之間有啲反應你預料唔到o架嘛。
DJ：問候番你喇譬如。鬧到你...
棠：一定搞得掂o架，一定搞得掂嗰喎。
DJ：你都諗咗好多個?
棠：唔駛諗o架，唔駛諗，無得諗，呢啲嘢你係無得諗嘅。例如試過有陣時有啲好順利啊，你落曬我答，一路玩，大家好開心。例如有啲係好唔肯就範嘅，好扭擰嘅，或者係同你唱反調嘅，都一定有辦法，你咪跟住佢囉。因為其實，經驗嚟講，我除咗舞台劇，舞台劇當然都要講執生喇，咁我做主持做司儀個經驗都唔係淺，咁呢啲現場嘅嘢，或者你觀人於微啊，聽佢，最緊要聽佢講乜嘢，去觀察佢個人係點，搵番佢一啲嘢嚟玩囉，跟番佢話題去玩囉。
DJ：咁嘛係。考下你個臨場反應先，咁點用你對一啲男性嘅方法去交待下我哋而家先去一去廣告，陣間番嚟再聽? 嗱，唔好講粗口。哈哈哈。
棠：飲嘢飲嘢屙尿屙尿，轉頭見。
DJ：哈哈哈哈哈。
- Part II -
DJ：好，各位聽眾，大家飲完嘢喇...
棠：屙完喇，記得洗手吖!
好，我哋返嚟再同歐錦棠呢個《死佬日記》嘅主角，亦都係唯一一個角色去傾嘅。我哋就睇你嗰個可唔可以叫舞台劇定棟篤笑嘞，你覺得應該叫做?棠：我又唔覺得係棟篤笑。嗱，棟篤笑其實有個不成文的規律嘅，要揸住支咪嘅，基本上係要揸住支咪嘅，同埋永遠都係喺度講同埋互動。咁佢都叫棟篤笑，但係我又覺得我有好多形體嘅動作喇，有drama喺內邊喇咁，所以，兩樣喇。
DJ：之前重有啲，即係響個舞台劇開始之前重有啲錄像片嘅。
棠：係。
DJ：嗰個就係你喇，同埋你太太喇。你太太又OK嘅，即係上埋鏡，因為佢都係演員喇。
棠：佢哋又係話，即係外國版權公司又話，嗱，佢哋呢個有要求嗰喎，video又唔係我哋話想拍嘅，要有呢啲嘢嘅。佢哋有曬規劃嘅，應該點拍，有啲乜嘢嘅內容，佢會話埋畀你聽，你可以揀，譬如有20個case，你拍10個喇，你鍾意，20個內邊你揀10個嚟拍就得o架喇。
DJ：呢啲case就係要顯示男女大不同?
棠：係喇。生活上面一啲唔同嘅細節喇，點樣有衝突啊，好趣味性咁樣去表達出嚟咁。所以我哋收尾知道呢樣嘢嘅時候高志森就諗，還定都係，不如叫你老婆出鏡。因為個身份就係我做番我自己，初初就諗，我喺內邊有另一個角色，死佬嘅角色，有一個英文名嘅，如果譯作中文叫阿略(?)嘅。收尾話，好out喎咁。因為始終出咗嚟呢個戲話多話少要好表達到個人嘅真性情先得嘅。若果唔係的話你演一個角色，但係你無一個個人嘅真性情，觀眾可能唔係咁容易投入。咁不如就掟我自己好真嗰面，好男人、好粗嗰面出嚟，咁如果係咁，不如用番「歐錦棠」嚟做喇。
DJ：咁係咪真係你真實嘅一面? 譬如你會喺嘞真係準備洗衫嗰堆嘅污糟衫抄番件衫嚟著出街?
DJ：有無試過先?
棠：唔係淨係我係咁o架! 好多男人都係咁o架!
DJ：不過唔係呀，呢一個嘞我諗唔一定係男人係咁。
DJ：你都係咁?
DJ：無! 我以前有一個同房嘞，即係讀大學嗰時，佢抄到無衫，真係出街嘅時候：「哎吔，死喇死喇，件衫去咗邊呀?」跟住佢抄啊抄，佢試過喺個洗衣籃抄番出嚟真係會...
棠：好似有一日喺某個場合聽到有個心理醫生喺度講佢嘅case，一個媽媽好嬲，喺度鬧個仔，跟住仔就見心理醫生喇。個媽就話：「由放學返屋企去到臨瞓嗰刻，我不斷叫佢沖涼，佢就不斷就不肯沖，臭o架嘛個身。」個仔話：「你嬲乜嘢啫? 我最尾我真係沖咗涼o架嘛。」我諗，咦，我細個嘅時候都係畀我阿媽咁鬧。咁你做乜迫我哋沖涼嘞? 我就覺得。沖一次咪得囉? 咪臨瞓之前沖咗上床瞓覺咪得囉?
DJ：係囉，唔會整污糟個床最緊要。
棠：係喇! 咪又係呢啲咁嘅嘢唔同囉! 所以呢啲唔關污唔污糟事，唔關事。
DJ：但我又覺得女人係唔同喎。
DJ：你有半邊係男人嚟o架，成日都覺得。
棠：可以係咁o架嘛。有陣時有啲嘢男人同女人都可以調番轉o架。
DJ：我哋鄙台嘞有個監製嘞，佢沖完涼，即係夜晚返屋企沖完涼...
棠：你點知佢沖完涼係點嘞?
DJ：佢講嘅。
棠：噢...
DJ：嗱，佢著件衫係聽日會著嘅，著件衫瞓覺。咁第日佢刷完牙，洗個面就可以行出去返工囉。
棠：佢啲衫係唔皺嘅，或者我諗都係皺到...
DJ：...見到佢，咦? 做咩你件衫調轉嚟著?
棠：我想象唔到啊。
DJ：係咪男人之中嘅男人嘞你話?
棠：我未聽過。
DJ：係咪好有男人味?
棠：我淨係聽過有啲，即係傳聞有啲物理學家、科學家，打開衣櫃佢所有嘅衫都係一樣嘅。
DJ：噢，呢個就係愛因斯坦。
棠：係喇係喇，愛因斯坦啲衫全部都一樣。
DJ：Q太郎嚟o架嘛? Q太郎又有七件衫，日日... Q太郎打開個衣櫃咪全部都係嗰啲衫。
DJ：咁頭先就講下男人同女人嘅不同喇。其中有一樣嘢就話男人每日講說話嘅字啊嘅words啊，咁個quota嘞個配額就2000個，女人就7000。
棠：係咁上下喇。
DJ：係咪咁喋喋不休嘞我哋其實?
棠：你覺得成個節目你訪問我，你講我講嘢多定你講嘢多?
DJ：由而家開始你講。
棠：咁其實我真係講唔到咁多嘢。
DJ：又完了? 嗰啲quota。
棠：唔係呀。其實真係o架。女人真係好鍾意講嘢。例如有一晚我打電話畀一個，我第一次打電話畀某一位女士，請教佢一啲工作上面嘅嘢。我第一次打電話畀佢咋，問完，好喇，好快，工作上面嘅嘢好快講完喇，5分鐘之內搞掂曬，跟住佢同我講咗另外嘅40分鐘電話。
DJ：講咩嘞?
棠：講佢自己另外工作上面遇到嘅嘢。
DJ：佢同你好friend嘅?
棠：係啩。
DJ：哈哈哈。即係你唔覺得係。電話之前唔覺得係。
棠：我諗下，我未打過電話畀佢嘅。咁你話，我哋當然認識，但個friend嘅程度...
DJ：即係同你訴苦定係咩?
棠：唔係，傾計。
DJ：你覺得好煩定?
棠：唔係，我慣嘅。但我估唔到居然會咁啫。第一次同人打電話你都唔會...
DJ：正常我都唔會嗰喎。
棠：譬如以前又有啲朋友，女性朋友，同佢講講，呃嗱，我有嘢講畀你聽，你唔好答我住，你唔好駁嘴先，你聽我講。跟住blah blah blah，講，講佢嘅故事，咁又15分鐘喇。我一路聽，我聽聽下就拎開個電話筒，佢把聲重係不斷喺度響，咁我一路數，有無呼吸位。我拎開就喺度數，無呼吸位，你剪唔走嘅，直去嘅要! 一係就成段刪走。好嘢喎! 真係可以咁嗰喎。點解女人真係可以講嘢講到咁犀利，唔駛停嘅呢?
DJ：但調番轉，我覺得有時唔係我哋女人鍾意講嘢，而係男人有時真係實在好唔鍾意講嘢，即係唔善於講嘢。所以有時嘞...
DJ：佢個舞台劇話，唔鍾意details。
DJ：可能係，我試過有一次真係同啲男仔食飯，真係可以成程唔出聲喎，咁我焗住搵嘢嚟講囉。
棠：嗱，無錯喇。有陣時你夾硬焗住嚟講嗰位係男人。即係男人點解會唔鍾意講嘢同埋唔識表達嘞? (因為佢哋)唔識去估啊! 好多時遇到有啲嘢嘅，見到女朋友或者老婆，個面口有啲唔同，「你咩事啊?」個女嘅話：「無嘢。」「你真係無嘢?」「無嘢!」咁男人就唔問o架喇。你話無嘢o架嘛，你話無嘢就無嘢，咁算喇。但係另一方面個女嘅可能想你去繼續問佢，有多啲溝通。
DJ：係呀係呀。
棠：去撩起佢啲嘢吖。最好你估到，估唔到的話你去兜好多問題，等你睇下有邊啲嘅方向去關心佢，咁然後佢先講佢嘅心底說話出嚟。男人唔想嘥呢啲時間，真係，一嘢到尾就啱o架喇，一就一，二就二。
DJ：嗱，我自己睇番，女性嘅身體就有時啲嘢佢唔想當面講出嚟，因為女仔有時佢會嬲咁喇，咁佢唔想話畀你聽佢點解嬲，佢覺得講出來好尷尬，可能係怕醜o架咋。所以就要：你問喇。
棠：咁鍾唔鍾意人問呢?
DJ：都會。好過真係唔理囉。
棠：但問到最後你都唔講答案。
DJ：咁都會講嘅。
棠：係咩? 但嘥好多時間落去問。
DJ：你係咪輔導緊我啊?
棠：嗰個問題就係話睇下個男人對你係有無興趣，或者有無企圖。
DJ：咁都會對住男朋友嗰啲先會嘅。
棠：對你係有無企圖，或者係無利害衝突關係嘅，咁就唔好嘥啲時間去問喇。
DJ：咦，你同你太太嘅相處會唔會都遇到呢啲問題啊?
棠：我同佢其實嗱，咁講嘅，我喺出便我好男人嘅，喺屋企...
DJ：返到屋企係鵪鶉，討好女人。
棠：喺屋企一半係男人，即係習慣係男人喇，例如喺個籃度攞番件衫嚟著嗰啲。啲襪嘞，我聽日都會著番嗰對襪o架喇嘛。嗱，襪，老老實實，我唔係日日洗嘅，因為我無腳汗，OK?
DJ：噢...
棠：我對襪除咗，我就撇喺個畫架嗰度喇，我地下有個畫架，聽朝我就喺度執番我對襪嚟著。
DJ：著幾耐? 著幾多次?
棠：你唔好理我喇。
DJ：哈哈哈哈，一個禮拜七次。
棠：你唔好理我喇! 呢啲嘢好男人嘅。即係運動、打功夫梗好男人喇。
DJ：係。
棠：但其他有啲細節，生活上面呢，我比較女人，我太太同我調番轉，佢比較男人，佢決定英明啲。
DJ：例如呢?
棠：無得...例如好簡單，去食咩嘢，今日去邊度，我唔想諗。咁好多時佢估我，我唔出聲，我唔話畀佢聽做乜，佢一路係咁估我做乜做乜，然後問我「你咩事吖? 係咪咁嗎?」但係佢就唔駛嘅，佢有咩唔啱唔妥佢講出嚟。
DJ：呢個都真係幾...通常女人嘞十居其九都真係要估。
棠：當然你估到佢都會開心，估唔到佢咪開估囉。
DJ：你覺唔覺得阿Joyce有少少男人嘅性格? 比較男仔頭喇。
棠：咁佢唔算男仔頭。我無話你係男仔頭，我驚奇就係話你都有啲男人嗰啲咁嘅性格喺度啫。
DJ：你承唔承認?
DJ：承認。
棠：其實我話畀你聽，如果係獨立性強D嘅女仔嘞，點都會有啲男仔格喺度嘅。
DJ：咁嘛係。
棠：你出嚟生活啊，照顧自己啊，你無啲男仔嘅，所謂嗰種堅強喺度，你點去protect自己啊? 你點去一個人去生活啊?
DJ：喂，頭先講到嘞，真係返到屋企都會似番個女人嘅時候，喺套劇嗰度你都交待咗好似近年嘞都多咗啲男性開始有啲女性化。譬如近年啲廣告木村周身喺度扭嚟扭去咁。
棠：其實好得意吖! 呢個其實，嗱，呢個題目我話畀你聽，我真係廿年前同一個大學嘅老師，佢喺度講，佢話：廿一世紀嘅新男士蒞臨喇。廿一世紀新男士? 廿一世紀嚟緊喇嗰陣時係嗎? 咁新男士係點，反對有暴力喇當然，反對用一種好mature咁嘅肌肉型啊粗獷型啊，咁樣嘅男士已經唔再係潮流喇。跟住落去嗰幾廿年唔會有女人會鍾意呢啲男性嘅。我哋要文質彬彬，我哋要斯文。咁其實佢講講下，我覺得，嗰陣時我喺度諗，我無駁，係咪即係女性化咁意思嘞? 係唔係camp嘞已經開始?
DJ：未去到camp嘅位。
棠：未去到但已經有女性化喺內邊，即係奶油嗰咋喎，以前上海嗰陣時譬如講，即係奶油嗰咋喎。咁你可能話已經係廿一世紀新男士就係呢啲喇，有學養、要斯文、文質彬彬、有風度。
DJ：係，即係著衫嘅趨勢都係嘞，即係興瘦削啲嘅，有啲男仔，買女裝試過有個男仔去買嗰啲吊帶褲。
棠：而家我先覺得大件事。我見到好多時年輕人，即係未發育嗰啲我就唔好計佢喇，廿幾歲卅歲仔嚟緊冚拌爛冚拌爛個身係未發育到嘞...洗衫板都嫌畀咗面佢。我覺得男人係薄chi chi到咁樣，不成體統吖呢樣嘢。
DJ：嘩，真係好多唔同嘅男人嘞可以喺《死佬日記》呢個舞台劇嘞就真係見到嘅，因為嘞歐錦棠嘞唔單止聲演呐，形體上嘞都有好多唔同嘅演繹方法。咁我要提一提觀眾，入場又好，即將買飛入場都好嘞，一定要坐到依個舞台劇完先至好走吓。真係唔好響中間嘅時候，好似覺得，咦，係咪應該走喇? 嗰陣時走。一定要坐到完先走。點解嘞? 自己去睇番喇。咁依套舞台劇一直就做到7月3號嘅，加咗一場，原先如果你睇宣傳單張嘞就寫到去到7月1號o架咋。咁歐錦棠，阿棠嘞都會帶啲禮物畀我哋聽眾係咪。
棠：係呀!
DJ：就問一個問題，咁大家打嚟1872881嘞又可以攞到佢嘅兩張戲飛o架喇。
棠：即係呢個死佬日記呢係邊一度最長壽嘅棟篤笑嘞?
DJ：頭先嘞有三個字大家應該都記得o架喇。如果唔記得畀啲貼士喇，呢三個字嘞都係同時係香港某大型電器商都係用呢三個字。
棠：係喇。同埋香港某大型嘅電影院嘞又係用呢三個字嘅。
DJ：咦，係喎。
DJ：咁多貼士都估唔到就真係唔係男人喇。哈哈哈哈。
DJ：好喇，1872881 1872881 咁唔該曬阿棠!
棠：Thank you!