歌后多悲慘

以前寫稿界有一位大名鼎鼎嘅小生姓高,當今舞台劇有一位好出名嘅春天高。呢日春天高在蘇浙同鄉會請食飯,起筷前係咁易講番幾句:「潤發哥哥有一句名言,佢好鍾意到影棚食飯盒,有飯盒食就表示有工開啦! 我就好鍾意請大家食飯,請你哋食飯就表示我有project在手!」春天高謙啫,佢有時間與朋友吃晚飯嘅話,何須等到有工開至請?

在座一位朋友話佢係藝術發展局委員,問春天高有冇申請藝發局資助,春天高一聽見就進入狀態,聲音提高半度咁講:「我哋申請過好多次,次次肥佬,藝發局話我哋搞商業化,唔係搞藝術,不符資格。其實係啲委員老爺概念不清,商業化與藝術係兩個不同層面。戲劇本身可以係藝術,但營運包裝方面可以係商業,兩者結合就可以在市場生存。你話Phantom係藝術還是商業? 當然兩樣都係。香港有啲團體空談藝術,就一味向納稅人攞錢,藝發局唔批,佢哋就唔做,然後寫文章罵特區政府不培養藝術文化,無整體文化政策。我就唔同,以商業養藝術,藝發局唔畀錢我都捱住嚟做。」

越聽越有火,但不無道理,「蘋果批」不妨批一批,班「蘋果批」老友相信會與一班「文化伸手作家」大打擂台! 春天高今次有project,一共兩個,都係大膽製作,其一係搵歐錦棠一人演足全場九十分鐘嘅《死佬日記》,八月六日在理工大學賽馬會綜藝館開演,套劇由精通歐洲歌劇嘅陳鈞潤翻譯自Rob Becker嘅百老匯長壽棟篤笑。另一套係由劉雅麗個人唱足、演出嘅《蔓珠莎華》,以梅艷芳三十二首金曲刻畫一代歌后的傳奇一生,七月三十日開始,共演七場。

有朋友問春天高:「唱阿梅三十二首歌,係唔係影射佢?」春天高話:「並無此意,我研究過梅艷芳、周璇、法國歌后Edith Piaf甚至加埋鄧麗君嘅人生,發覺有好大共通點,就係小時坎坷,唱歌支持家庭,青年時走紅,愛情失敗,遇人不淑,英年早逝,結局悲慘,好令人唏噓感慨,《蔓珠莎華》用梅艷芳金曲表達歌后一生,只係形式啫,並非故意影射。」

-- 以上內容來自2008年7月21日 蘋果日報 左丁山 GG細語 --

>>錦棠作品 - 死佬日記<<