歐錦棠大粒癦 發哥睇唔順眼叫脫

周潤發唔係成日蒲頭,曝光率冇依家啲o靚界偶像咁勁,但佢仍然好得人鍾意,除咗發哥平時愛周街行,作風親民外,發哥對人仲好有心,有次仲企喺街度叫個男演員「脫」!

畀發哥睇中嘅仁兄唔係當家小生或乜乜巨星,而係歐錦棠,以SoSo姐嘅記憶中,歐錦棠同發哥應該唔熟,連阿棠自己都話奇,當日係佢喺街度行行吓,突然見到發哥嗌住佢,仲好熟落咁捉住佢傾咗十五分鐘,講乜呢? 發哥對住佢話:「你右眼粒癦脫咗去啦! 我成日睇電視見到你粒癦好唔順眼,快啲脫啦! 劉松仁做到依家都係男主角,你脫咗大把運行啦!」發哥仲熱心問佢有冇相熟醫生,又問阿棠攞電話聯絡吓。

以為自己發緊夢嘅阿棠,只係好開心發哥咁留意自己嘅演出,仲未得閒諗係咪脫癦嘅時候,話咁快就收到發哥嘅電話,話介紹位名醫過佢,得發哥對自己咁好,阿棠話睇相佬叫佢都唔信,但發哥講一句,佢信到十足十,仲即刻排期脫癦。

-- 以上內容來自 2008年7月16日 太陽報 C12 --