歐錦棠斥《蘋果日報》補鑊冇誠意

 

早前慘被《蘋果日報》誣衊為鹹豬手的歐錦棠,昨日接受RoadShow訪問時表示事件令他仍忿忿難平,他說:「《蘋果日報》冇道歉,點解做錯咗都唔認?佢哋有人搵過我,話上次出咗你半版,畀番半版專訪你嘞!咁咪等如踢你一腳,賠番只鞋畀你,唔係一對喎,因為踢咗你一腳之嘛,都冇誠意。」歐錦棠繼續說:「佢哋一次又一次話我,經理人公司保護我,認為話我鹹豬手對我有傷害性,要搵律師處理。我因為呢件事心情唔好,亦都笑唔出,係《蘋果日報》內部有問題,佢哋要解釋清楚成件事。」

昨日阿棠亦順道傾談為RoadShow 擔任李小龍三十周年特輯的嘉賓主持,他稍後更會搞一個李小龍舞台劇,阿棠做男主角,女主角則是羅敏莊,預計12月公演。而阿棠打算製作一個1:1的李小龍像,希望可同旅遊發展局合作,藉此推廣旅遊業。

-- 以上内容來自2003年5月15日 東方日報及成報 --