歐錦棠節儉是美德 地鐵代步一樣開心

歐錦棠在亞視來說，知名度都算頗高，尤其做過亞姐司儀，更加錦上添花。雖然他入行至今，主力做電視，但很多時都有私人聚會請他做司儀，又或返大陸登台，收入算不錯，不過他為人節儉，從不亂花費，同事時常取笑他儲埋不少錢。

他聽到後立即笑笑口說要澄清：「邊有儲到好多錢啫，亞視份人工有數得計，如果還亂咁使錢，一定入不敷出，況且做我們這行，搵錢無定，黑棋來得份人工搵唔到外快，又使大咗個頭，你話幾嚴重啦!」

為了減少開支，他現在就算搵到多少錢，亦不會的士出、的士入，地鐵、小巴成為他的日常出入交通工具，完全沒有感到尷尬。「地鐵幾好呀，唔駛怕塞車，包保不會遲到，有時撞到有人認得，我通常會笑吓，啱傾仲會趁着車程傾一大輪，我知自己唔係天王巨星，加上男人不怕被人博懵，乘公共交通工具出入自如。」

其實和阿棠最啱傾的話題，非他的偶像李小龍莫屬，講起小龍哥他便控制不到，可以講數個小時都不覺得悶。

他笑一笑；「我從來未試過崇拜一個人到咁厲害嘅程度，家裏亦收集不少有關佢嘅資料，我覺得佢真係好叻，叻到全世界嘅人差唔多都識佢，我有佢一半成績願囉。」他還表示，有些資料自己是只此一家，好似亞視拍「精武門」，他都主動提供了不少資料。

他幸好是鐵漢柔情，對女友萬斯敏一樣寵愛有加，問到婚期他則是耍手擰頭：「現在未是時候，大家仲年青，應該趁後生搵錢為將來鋪路，女友嘅想法同我接近，唔係我和佢都不會一起。」

他雖和女友都是亞視藝員，平時碰着的機會不大。「始終她拍劇為主，多數在清水灣開工，我則負責綜合性節目，若返工時間夾到，我哋會約埋一齊返工。」

-- 以上內容來自1995年9月23日 成報 --